O‘zbekiston bo‘yicha to‘y va marosim o‘tkazish bilan bog‘liq bir kunda 300 tagacha qoidabuzarlik sodir etilgan. Bu haqda Ichki ishlar vazirligi axborot xizmatiga tayanib, O‘zA xabar berdi.
IIV axborot xizmati boshlig‘i Shohruh G‘iyosovning ma’lum qilishicha, ushbu yo‘nalishda Sirdaryo viloyatida 16 ta, Jizzaxda 21 ta, Navoiyda 32 ta, Buxoroda 48 ta, Andijonda 14 ta, Namanganda 74 ta, Qashqadaryoda 41 ta, Surxondaryoda 10 ta va Qoraqalpog‘iston Respublikasida 27 ta huquqbuzarlik aniqlangan.
Ta’kidlanishicha, karantin davrida marosimlarni o‘tkazishning belgilangan talablariga rioya qilmagan fuqarolar o‘rnatilgan tartibda ma’muriy javobgarlikka tortiladi. Jumladan, Surxondaryo viloyati Bandixon tumanidagi “Birdamlik” mahallasida yashovchi fuqaro B.Shokirovning 28-sentabr kuni o‘tkazilgan nikoh to‘yiga to‘y egalari 30 kishidan ko‘p odam chaqirib, karantin qoidalarini buzgan. Shu sabab fuqaroga nisbatan Ma’muriy javobgarlik to‘g‘risidagi kodeksning 54-modda 2-qismiga asosan ma’muriy bayonnoma rasmiylashtirilgan.
Mazkur huquqbuzarlik uchun fuqarolar bazaviy hisoblash miqdorining 20 baravaridan 30 baravarigacha, mansabdor shaxslar esa 30 baravaridan 50 baravarigacha miqdorda jarima to‘lashiga sabab bo‘ladi.
Eslatib o‘tamiz, O‘zbekistonda koronavirus epidemiyasi tarqalishining oldini olish maqsadida 23-martdan e’tiboran ommaviy tadbirlar, xususan, to‘y-marosimlarning o‘tkazilishi taqiqlangan edi. Ushbu taqiqdan so‘ng to‘y marosimlarini o‘tkazishga uringanlarga nisbatan hatto jinoyat ishi ham qo‘zg‘atildi.
Mamlakatda epidemiologik vaziyat barqarorlashib, nisbatan nazorat ostiga olingach, Respublika maxsus komissiyasining 30-maydagi qarori bilan “yashil” toifaga kiritilgan hududlarda oilaviy tantana, to‘y, ma’raka va marosimlarni 30 kishidan ko‘p bo‘lmagan holda o‘tkazishga ruxsat berildi.
Mamlakatda koronavirus bilan bog‘liq vaziyat keskinlashgani sababli 10-iyuldan boshlab mamlakatda to‘ylarni o‘tkazish yana taqiqlandi.
O‘zbekistonda 15-avgustdan 30 kishilik to‘ylarni o‘tkazishga yana ruxsat berildi.
Mavzuga doir:
Izoh (0)