Навоий вилояти ҳудудида тезликни ошириб, ЙТҲ содир этган бухоролик фуқарога нисбатан жиноят иши қўзғатилди. Бу ҳақда «Дарё»га вилоят ИИБ ЙҲХБ матбуот гуруҳи катта инспектори Фарруҳ Якубов хабар берди.
Таъкидланишича, 2020 йилнинг 28 сентябрь куни Кармана тумани ҳудудидан ўтувчи М-37 Самарқанд—Бухоро—Туркманбоши автомобиль йўлининг 163-километрида ЙТҲ содир бўлган.
Бухоро вилоятининг Ғиждувон туманида яшовчи О.Н. ўзига тегишли бўлган MAN русумли транспорт воситасини Бухоро—Самарқанд йўналишида бошқариб бораётганда ҳаракатни юқори тезликда оширган ва ҳушёрликни йўқотган. Нур қайтарувчи жиҳозлар ўрнатилмаганлиги сабабли олд томонида ҳаракатланиб бораётган «ТТЗ-100» русумли тракторни кўрмай қолган ва унинг орқа томонига зарб билан урилган. Оқибатда «ТТЗ-100» ҳайдовчиси бўлган Кармана тумани фуқароси Б.Т. оғир тан жароҳати олган.
Мазкур ҳолат юзасидан фуқаро О.Н.га нисбатан Жиноят кодексининг 266-моддасининг 1-қисми (транспорт воситалари ҳаракати ёки улардан фойдаланиш хавфсизлиги қоидаларини бузиш) билан жиноят иши қўзғатилган. Ҳозирда тергов ҳаракатлари олиб борилмоқда.
Эслатиб ўтамиз, аввалроқ Тошкентда ҳайдовчилик гувоҳномаси бўлмаган 16 ёшли қиз содир этган ЙТҲ оқибатида 14 ёшли бола вафот этгани, Андижонда эса Volvo юк машинаси икки нафар қизалоқни босиб кетиб, хонадонларнинг бирига бориб урилгани ҳақида хабар берилганди.
Мавзуга доир:
- Юнусободда Spark ва Hyundai иштирокидаги ЙТҲ оқибатида 6 киши жароҳатланди. Бир киши шифохонага олиб кетилаётганда вафот этди
- Самарқандда 18 ёшли ўсмир автобус уриб юбориши оқибатида вафот этди. Тез ёрдам шифокори ЙТҲ жойига етиб борганида жабрланувчи ўз ўғли эканлигини билди
- Ургутда 21 ёшли йигит «Жигули»сида велосипедда кетаётган синфдошини уриб юборди. Велосипедчи воқеа жойида ҳалок бўлган
Изоҳ (0)