Самарқанд вилояти Ургут туманида «ВАЗ-2106» ҳайдовчиси велосипедчини уриб юборди. Кейинчалик, йўл транспорт ҳодисасининг иккала иштирокчиси ҳам бир мактабда, бир синфда ўқиган синфдошлар экани маълум бўлди. Бу ҳақда «Севимли» телеканалининг «Замон» информацион дастурида лавҳа берилган.
Ургут тумани «Аълохотин» МФЙ ҳудудида соат 20:30 лар атрофида содир бўлган ЙТҲда 21 ёшли йигит ҳалок бўлган. «Жигули» ҳайдовчисининг сўзларига кўра у тахминан 80 километр/соат тезлик билан ҳаракатланиб кетаётган вақтида, олдидаги Lacetti кутилмаганда тезкор тарзда йўлнинг ўнг томонига ўтиб олган ва «ВАЗ-2106» ҳайдовчиси велосипедчини кўрмай қолиб, уни уриб юборган.
Лавҳада айтилишича, жабрланувчи ҳам уни уриб юборган синфдоши ҳам ҳали уйланмаган йигитлар. Ҳалок бўлган йигитнинг қариндоши унинг унаштирилгани, тўй яқин бўлгани ҳақида гапирган.
Аввал Самарқандда икки Nexia иштирокидаги ЙТҲ оқибатида йўловчилардан бири ҳалок бўлгани, Пахтачи туманида Isuzu юк машинаси уриб юборган Gentra’да икки йўловчи вафот этгани, Оқдарё туманида Lacetti ҳамда «ПАЗ-742» транспорт воситасининг тўқнашуви оқибатида икки киши ҳалок бўлгани ҳақида хабарлар берилганди.
Изоҳ (0)