Ўзбекистоннинг Россиядаги элчихонаси ва Ростов-Дон шаҳридаги бош консулхонасига Абхазия ҳудудида бўлиб турган 400 га яқин Ўзбекистон фуқаросининг ватанга қайтишда кўмак бериш тўғрисидаги мурожаатлари келиб тушган. Бу ҳақда Ўзбекистон Ташқи ишлар вазирлиги оператив штаби маълум қилди.
Қайд этилишича, ушбу муаммони зудлик билан ҳал этиш мақсадида Ўзбекистон Ташқи ишлар вазирлиги Россия томонига ўзбекистонликларни ватанга қайтариш учун уларнинг Россия чегарасини кесиб ўтишига рухсат олиш юзасидан яна бир бор тегишли мурожаат юборган.
Ёрдамга муҳтожлардан (аёллар, ҳомиладорлар, қариялар ва болалар) иборат Ўзбекистон фуқароларининг биринчи гуруҳини 2020 йилнинг октябрь ойи бошларида Ўзбекистонга қайтариш режалаштирилган.
«Қолган фуқаролар Россия томонидан давлат чегарасини транзит мақсадида кесиб ўтишга рухсат берилгандан кейин Ўзбекистонга қайтарилади», — дейилади вазирлик хабарида.
Аввалроқ Россиянинг Самара ва Ростов вилоятларидаги палата лагерларда яшаган барча ўзбекистонликлар ватанга қайтарилганди.
Изоҳ (0)