Тошкентдаги Халқаро конгресс марказида 1 октябрь – Ўқитувчи ва мураббийлар кунига бағишланган тантанали маросим бўлиб ўтди. Тадбирда Ўзбекистон Президенти Шавкат Мирзиёев иштирок этди.
Таъкидланишича, ушбу байрам илк бор давлат раҳбари иштирокида ўтяпти.
«Биз ҳар биримиз ҳаётда қандай муваффақият ва натижаларга эришган бўлсак, бу ютуқларда сизларнинг беқиёс ҳиссангиз борлигини доимо миннатдорлик билан эътироф этамиз», – деди Шавкат Мирзиёев тадбирга йиғилган ўқитувчи ва зиёлиларга мурожаатида.
Президент тарихга назар солиб, IX-ХИИ асрларда Ўзбекистон ҳудудида биринчи, XV асрда иккинчи ренессанс порлаганини таъкидлади.
«Кўпчилик зиёлилар қаторида мен ҳам бир фикрни ҳамиша катта армон билан ўйлайман: мамлакатимизда учинчи ренессансни ХХ асрда маърифатпарвар жадид боболаримиз амалга оширишлари мумкин эди. Улар «Илмдан бошқа нажот йўқ ва бўлиши ҳам мумкин эмас», деган ҳадиси шарифни ҳаётий эътиқод деб билдилар», – дея таъкидлади Президент.
Ўқитувчи ва мураббийлар байрами муносабати билан имзоланган фармонга мувофиқ, халқнинг озодлиги ва фаровон ҳаётини таъминлаш йўлида фидокорлик кўрсатиб, миллий таълим ва тарбия тизимини яратишга беқиёс ҳисса қўшган Абдулла Авлоний, Маҳмудхўжа Беҳбудий ва Мунавварқори Абдурашидхонов «Буюк хизматлари учун» ордени билан тақдирлангани маълум қилинди.
Шавкат Мирзиёев Ўзбекистонда янги Уйғониш даври, яъни учинчи ренессанс пойдеворини яратиш асосий мақсад қилиб белгиланганини таъкидлади.
«Буюк аждодларимизнинг бетакрор ва ноёб илмий-маънавий мероси биз учун доимий ҳаракатдаги ҳаётий дастурга айланиши керак. Бу ўлмас мерос ҳамиша ёнимизда бўлиб, бизга доимо куч-қувват ва илҳом бағишлаши лозим. Авваламбор, миллий таълим тизимини ана шундай руҳ билан суғоришимиз керак», – деди Президент.
Байрам тадбирида ўқитувчи ва мураббийлар, олимлар, парламент ва ҳукумат вакиллари иштирок этди. Шунингдек, ҳудудлардаги соҳа фидойилари маросимни Қорақалпоғистон ва вилоятлардаги студиялардан кузатиб борди.
Мавзуга доир:
- Шавкат Мирзиёев мустақиллик байрами муносабати билан коронавирусга қарши курашаётган тиббиёт ходимларидан бир гуруҳини тақдирлади
- Мустақилликнинг 29 йиллиги муносабати билан Шавкат Мирзиёев чет эл фуқаролари ва хорижда яшаётган ўзбекистонликларни мукофотлади
- Ўзбекистонда коронавирус қурбони бўлган тўрт нафар тиббиёт ходими «Жасорат» медали билан мукофотланди
Изоҳ (0)