Коронавирусга чалинган беморларни даволаш учун вақтинчалик марказга айлантирилган Жиззах политехника институти ётоқхонасининг 411-хонасида даволанаётган фуқаро Қобилжон Абдусатторов Ўзбекистон соғлиқни сақлаш вазири Алишер Шодмоновга мурожаат қилиб, дориларни ўз ҳисобидан сотиб олаётгани, беморларга овқат берилмаётгани ҳақида гапиргани хабар қилинганди.
Фуқаро ўз мурожаатида давлат коронавирусга чалинган ҳар бир бемор учун 32 миллион сўмдан пул сарфланаётгани ҳақида баёнот бераётган бир вақтда у нима учун дориларга ўз ёнидан пул сарфлашга мажбур бўлаётганига қизиққан, шунингдек, мурожаат қилган куни бутун бошли бир бинодаги беморларга бир челак овқат берилгани, ётоқхона остонасига ҳар куни ўнлаб одамлар ёрдам сўраб келаётганига қарамай, унинг ёнидаги койка нима учун бир кундан бери бўш қолаётганини маълум қилган.
Бош прокуратура томонидан маълум қилинишича, фуқаро Қобилжон Абдусатторовнинг ижтимоий тармоқларда тарқалган видеомурожаати Бош прокуратура томонидан кўриб чиқилди.
Мазкур мурожаатда баён қилинган ҳолатлар юзасидан Жиззах вилоят прокуратураси томонидан ўрганиш ишлари бошланди. «Натижаси ҳақида қўшимча равишда хабар берилади», — дейилади Бош прокуратура хабарида.
Аввалроқ Тошкентдаги «Ёшлик» аренасида ташкил этилган 520 ўринлик саралаш марказида бирорта ҳам бўш ўрин қолмагани ҳақида хабар берилган эди. Шунингдек, пойтахтдаги «Универсал» спорт мажмуасида ташкил этилган вақтинчалик шифохонада ҳам қонунга зид хатти-ҳаракатлар содир этилгани ҳақида мурожаат пайдо бўлган, кейинроқ бунга шифохона ташкилотчиси ҳисобланган Ички ишлар вазирлиги муносабат билдирган эди.
Изоҳ (0)