Ўзбекистон олий таълим муассасаларининг бакалавриат босқичига 2020/2021-ўқув йили учун ўтказилган кириш имтиҳонларининг якуний натижалари эълон қилинди. Баъзи таълим йўналишларида абитуриентлар имтиҳон топширилган иккита фан бўйича тўплаш мумкин бўлган энг юқори 189 баллни тўплаган, бироқ улар давлат гранти эмас, балки тўлов-контракт асосида талабаликка тавсия қилинган. Давлат тест маркази мазкур ҳолатга изоҳ берди.
ДТМ томонидан маълум қилинишича, Вазирлар Маҳкамасининг 2008 йил 13 октябрдаги 226-сон қарори билан Халқаро ва республика олимпиадалари, танловлари, мусобақалари ғолиблари бўлган академик лицейлар, профессионал таълим муассасалари ва умумтаълим мактаблари ўқувчиларини тақдирлаш тартиби тўғрисида низом тасдиқланган. Низомга мувофиқ:
- Республика (1-ўрин) ва халқаро танловлар ва мусобақаларнинг (Олимпия ўйинларида, Осиё ўйинларида, Жаҳон чемпионатида ва Осиё чемпионатида 1—3-ўринлар) индивидуал турларида ғолиб чиққан академик лицейлар, профессионал таълим муассасалари ва умумтаълим мактабларининг битирувчилари олий таълим муассасасига тест синовларисиз ва қўшимча имтиҳонсиз қабул қилинади.
- Республика (1-ўрин) ва халқаро танловлар ва мусобақаларнинг (Олимпия ўйинларида, Осиё ўйинларида, жаҳон чемпионатида ва Осиё чемпионатида 1—3-ўринлар) жамоа турлари ғолиблари ўз жамоалари таркибидан — академик лицейлар, касб-ҳунар коллежлари ва умумтаълим мактаблари битирувчиларидан олий таълим муассасасига тест синовларисиз ва қўшимча имтиҳонсиз қабул қилиш учун уч номзодни белгилайди.
Давлат тест маркази томонидан қайд этилишича, 2020 йил якуний танлов рўйхатида айрим бакалавриат таълим йўналишларида энг юқори 189 баллни тўплаган ҳолда тўлов-контракт асосида талабаликка тавсия этилган абитуриентлар мавжуд.
«Мазкур таълим йўналишларига юқорида қайд этилган имтиёзга эга абитуриентлар ҳам рўйхатдан ўтган бўлиб, ушбу тоифадаги абитуриентлар сони ажратилган давлат грантлари сонига тенг ёки ундан кўп бўлган ҳолатлар ҳам учрайди.
Шунинг учун айрим бакалавриат таълим йўналишларида 189 балл тўплаган абитуриентлар ҳам тўлов-контракт асосида талабаликка тавсия этилган», — дейилади ДТМ изоҳида.
Эслатиб ўтамиз, Ўзбекистонда 2020/2021-ўқув йили учун ўтказилган тест синовлари натижаларига кўра, республика ОТМлари бакалавриатига жами 140 068 нафар абитуриент талабаликка қабул қилинди. Давлат гранти асосида ўртача ўтиш бали — 133,3 баллни, тўлов-контракт асосида ўртача ўтиш бали — 110,6 баллни ташкил этди.
Ўзбекистон ОТМларига қабул бўйича ўтказилган тест натижаларидан қониқмаганлар учун ДТМнинг апелляция комиссияси ўз фаолиятини 2020 йил 28 сентябрдан бошлайди.
Базавий тўлов-контракт асосида талабаликка тавсия этилмаган, лекин 56,7 балл ва ундан юқори балл тўплаган абитуриентлар табақалаштирилган тўлов-контракт асосида ўқиш учун 2020 йил 26 сентябрдан бошлаб олий таълим муассасаларига мурожаат этиши мумкин.
Изоҳ (0)