DTM O‘zbekiston OTMlariga kira olmagan abituriyentlar super-kontrakt uchun qachondan ariza yozishlari mumkinligini ma’lum qildi.
Foto: “Daryo”
Yoshlarning ta’lim olishi uchun imkoniyat yaratish maqsadida bazaviy to‘lov-kontrakt asosida talabalikka tavsiya etilmagan, lekin 56,7 ball va undan yuqori ball to‘plagan abituriyentlarga tabaqalashtirilgan to‘lov-kontrakt asosida o‘qish imkoniyati yaratilgandi. 2019-yilda 32 948 nafar abituriyent ushbu imkoniyatdan foydalangan.
Buning uchun ushbu toifadagi abituriyentlar 2020-yil 26-sentabrdan boshlab oliy ta’lim muassasalariga murojaat etishlari mumkin.
Ma’lumot uchun, super-kontrakt faqat birinchi yil uchun to‘lanadi (oddiy kontraktning summasi ham shuning ichida). Talabalar birinchi o‘quv yilini tugatgandan so‘ng keyingi o‘quv yilidan boshlab amalda o‘rnatilgan bazaviy to‘lov-kontrakt miqdori asosida o‘qishini davom ettiradi.
O‘zbekistonda 2020/2021-o‘quv yili uchun OTMlarining bakalavriat ta’lim yo‘nalishlariga kirish test sinovlarining natijalari 25-sentabr kuni 15:00 da DTMning rasmiy veb-saytida e’lon qilindi. Unga ko‘ra, respublika OTMlari bakalavriatiga jami 140 068 nafar abituriyent talabalikka qabul qilindi. Davlat granti asosida 28 173 nafar (jami topshirganlarning 20,1 foizi) abituriyent, to‘lov-kontrakt asosida 111 895 nafar (jami topshirganlarning 79,9 foizi) abituriyent talabalikka tavsiya etilgan.
