O‘zbekiston oliy ta’lim muassasalarining bakalavriat bosqichiga 2020/2021-o‘quv yili uchun o‘tkazilgan kirish imtihonlarining yakuniy natijalari e’lon qilindi. Ba’zi ta’lim yo‘nalishlarida abituriyentlar imtihon topshirilgan ikkita fan bo‘yicha to‘plash mumkin bo‘lgan eng yuqori 189 ballni to‘plagan, biroq ular davlat granti emas, balki to‘lov-kontrakt asosida talabalikka tavsiya qilingan. Davlat test markazi mazkur holatga izoh berdi.
DTM tomonidan ma’lum qilinishicha, Vazirlar Mahkamasining 2008-yil 13-oktabrdagi 226-son qarori bilan Xalqaro va respublika olimpiadalari, tanlovlari, musobaqalari g‘oliblari bo‘lgan akademik litseylar, professional ta’lim muassasalari va umumta’lim maktablari o‘quvchilarini taqdirlash tartibi to‘g‘risida nizom tasdiqlangan. Nizomga muvofiq:
- Respublika (1-o‘rin) va xalqaro tanlovlar va musobaqalarning (Olimpiya o‘yinlarida, Osiyo o‘yinlarida, Jahon chempionatida va Osiyo chempionatida 1—3-o‘rinlar) individual turlarida g‘olib chiqqan akademik litseylar, professional ta’lim muassasalari va umumta’lim maktablarining bitiruvchilari oliy ta’lim muassasasiga test sinovlarisiz va qo‘shimcha imtihonsiz qabul qilinadi.
- Respublika (1-o‘rin) va xalqaro tanlovlar va musobaqalarning (Olimpiya o‘yinlarida, Osiyo o‘yinlarida, jahon chempionatida va Osiyo chempionatida 1—3-o‘rinlar) jamoa turlari g‘oliblari o‘z jamoalari tarkibidan — akademik litseylar, kasb-hunar kollejlari va umumta’lim maktablari bitiruvchilaridan oliy ta’lim muassasasiga test sinovlarisiz va qo‘shimcha imtihonsiz qabul qilish uchun uch nomzodni belgilaydi.
Davlat test markazi tomonidan qayd etilishicha, 2020-yil yakuniy tanlov ro‘yxatida ayrim bakalavriat ta’lim yo‘nalishlarida eng yuqori 189 ballni to‘plagan holda to‘lov-kontrakt asosida talabalikka tavsiya etilgan abituriyentlar mavjud.
“Mazkur ta’lim yo‘nalishlariga yuqorida qayd etilgan imtiyozga ega abituriyentlar ham ro‘yxatdan o‘tgan bo‘lib, ushbu toifadagi abituriyentlar soni ajratilgan davlat grantlari soniga teng yoki undan ko‘p bo‘lgan holatlar ham uchraydi.
Shuning uchun ayrim bakalavriat ta’lim yo‘nalishlarida 189 ball to‘plagan abituriyentlar ham to‘lov-kontrakt asosida talabalikka tavsiya etilgan”, — deyiladi DTM izohida.
Eslatib o‘tamiz, O‘zbekistonda 2020/2021-o‘quv yili uchun o‘tkazilgan test sinovlari natijalariga ko‘ra, respublika OTMlari bakalavriatiga jami 140 068 nafar abituriyent talabalikka qabul qilindi. Davlat granti asosida o‘rtacha o‘tish bali — 133,3 ballni, to‘lov-kontrakt asosida o‘rtacha o‘tish bali — 110,6 ballni tashkil etdi.
O‘zbekiston OTMlariga qabul bo‘yicha o‘tkazilgan test natijalaridan qoniqmaganlar uchun DTMning apellyatsiya komissiyasi o‘z faoliyatini 2020-yil 28-sentabrdan boshlaydi.
Bazaviy to‘lov-kontrakt asosida talabalikka tavsiya etilmagan, lekin 56,7 ball va undan yuqori ball to‘plagan abituriyentlar tabaqalashtirilgan to‘lov-kontrakt asosida o‘qish uchun 2020-yil 26-sentabrdan boshlab oliy ta’lim muassasalariga murojaat etishi mumkin.
Izoh (0)