Навоий вилоятида Самарқанд–Бухоро йўналишида ҳаракатланиб кетаётган Isuzu русумли юк машинасининг ҳайдовчиси рулда ухлаб қолиб, Кармана тумани Варх массивидан ўтувчи зовурга тушиб кетди, деб хабар бермоқда ЙҲХББ.

Кадр: Telegram/ЙҲХББ

Дастлаб йўлнинг қарама-қарши томонига чиқиб кетган Isuzu Damas билан тўқнашиб, дарахтга урилди. Дарахтга урилгач бир қисмини зарарлаган Isuzu ҳаракатни давом эттириб, зовурга тушиб кетди.

Damas’ни бошқариб кетаётган ҳайдовчи бахтли тасодиф туфайли тирик қолган.

«Isuzu келиб, ургандан сўнг уни йўқотиб қўйдим. Кейин қарасам зовурда экан. Ҳайдовчи ҳушидан кетган эди», – дейди Damas ҳайдовчиси.

Кадр: Telegram/ЙҲХББ

Автомобиль ичидаги йўловчининг айтишига қараганда, Isuzu ҳайдовчиси шу қадар чарчоқ таъсирида бўлганки, ҳатто нималар бўлаётганини ҳам билмаган.

«Мен йўлдан кетаётганимда йўлнинг нариги томонига чиқиб кетибман. Damas билан тўқнашганимни ҳам билмайман. Хаёл бузилган эди», – дея ҳолатни изоҳлади Isuzu  ҳайдовчиси.

Сувга тушиб кетган Isuzu махсус кран ёрдамида зовурдан чиқариб олинган.