Tesla асосчиси Илон Маск компания акциядорлари билан ҳар йили ўтказиладиган Battery Day тақдимотида чиқиш қилди, деб ёзади CNBC.
Тадбиркорнинг айтишича, Tesla электромобиллари савдоси 2020 йилда 30-40 фоизга ошади, бу аввалроқ қилинган прогнозларга мос бўлиб, компания жорий йилда 500 мингта электромобиль тақдим этади.
Бундан ташқари, Маскнинг айтишича, компания кейинги уч йил давомида 25 минг доллар эвазига ҳайдовчисиз бошқариладиган электромобилларни чиқаришни бошлайди. Бироқ бизнесмен 2018 йилда ҳам худди шунақа ваъда берганди: ўшанда у мазкур мақсадга эришиш учун уч йил кетишини айтган.
Ҳозирда энг арзон Tesla Model 3 нархи 35 минг доллар туради.
Компания электромобиллар нархини ишлаб чиқариш ҳажмини ошириш ва аккумуляторлар қийматини тушириш ҳисобига эришмоқчи. Унга кўра, аккумуляторлар нархи 50 фоизга арзонлашиши керак. Ҳозирда аккумуляторларнинг ҳар бир киловатт-соати 130 доллар атрофида.
Маскнинг таъкидлашича, Tesla кўпроқ энергия тутувчи ва яхши совуйдиган аккумуляторларнинг эҳтиёт қисмларини ўзи ишлаб чиқаришни бошлайди.
Жорий йилги Battery Day тақдимоти ноодатий тарзда ўтказилган: Илон Маск чиқиш қилган барча акциядорлар Model 3 электромобилларида ўтирган.
Изоҳ (0)