Саудиялик журналист Жамол Қошиқчининг ўлимида айбланганларга тайинланган ўлим жазоси қамоқ жазоси билан алмаштирилди
Саудия Арабистони суди журналист Жамол Қошиқчининг ўлимида айбланган беш кишига тайинланган ўлим жазосини бекор қилди ва уни 20 йиллик озодликдан маҳрум қилиш жазоси билан алмаштирди. Бу ҳақда Meduza хабар берди.
Маълум қилинишича, яна бир кишига 10 йиллик, қолган икки кишига эса етти йиллик қамоқ жазоси берилган.
Саудия Арабистони Бош прокуратурасининг маълум қилишича, ҳукм якуний ҳисобланади. Ҳукм қилинганларнинг исмлари маълум қилинмаган.
Таъкидланишича, Қошиқчининг ўлими сабабли судланган беш кишига тайинланган ўлим жазоси журналистнинг ўғиллари сўровига асосан қамоқ жазосига алмаштирилган. 2020 йилнинг май ойида журналистнинг ўғиллари отасининг ўлимида айбдор бўлганларни кечиришини маълум қилган.
Вашингтондаги Араб маркази вакили, Қошиқчининг дўсти Халил Жаҳшаннинг тушунтиришича, Саудия Арабистони қонунларига кўра, қурбоннинг оиласи томонидан билдирилган кечирим жазони енгиллаштириш учун расмий сабаб ҳисобланади. Бироқ журналистнинг дўсти Қошиқчининг ўғиллари айбдорларни кечириш ҳақида ўз ихтиёри билан маълум қилганига шубҳа билдирган.
Жамол Қошиқчи The Washington Post журналисти бўлган ва ўз мақолаларида Саудия Арабистони ҳукуматини танқид қилган. У 2018 йилнинг октябрь ойида Саудия Арабистонининг Истанбулдаги элчихонасида ўлдирилган. Унинг жасади ҳозиргача топилмаган.
Туркия ҳукумати, АҚШ Сенати ва Марказий разведка бошқармаси журналистни ўлдириш ҳақидаги буйруқни Саудия Арабистонининг меросхўр шаҳзодаси Муҳаммад бин Салмон берганлигини маълум қилган. Саудия Арабистони ҳукумати эса журналистнинг ўлимини куч тузилмаларининг шахсий ташаббуси деб атаган.
Жиноятда гумонланганлар Саудия Арабистони судига топширилган. 2019 йилнинг декабрь ойида уларнинг беш нафари ўлим жазосига ҳукм қилинган, яна уч нафарига тайинланган қамоқ жазосининг умумий муддати 24 йилни ташкил этган.
