Ҳиндистон коронавирус билан касалланганлар сони бўйича Бразилияни ортда қолдириб, дунёда иккинчи ўринга чиқиб олди. Жонс Ҳопкинс университети маълумотларига кўра, мамлакатда COVID-19’га чалинганлар сони 4,2 миллион кишидан ошган.
Узоқ вақтдан бери касалланганлар сони бўйича дунёда иккинчи ўринни эгаллаб келаётган Бразилияда эса айни вақтда касаллар сони 4,137 миллионни ташкил этмоқда.
Ҳиндистонда коронавирус билан касалланиш бўйича қайд этилаётган суткалик ҳолат ҳам ўсишда давом этмоқда. 6 сентябрь куни мамлакатда 90 минг кишида касаллик аниқланган — бу пандемия бошланганидан буён рекорд кўрсаткич. Бир ой олдин Ҳиндистонда ҳар куни тахминан 60 мингга яқин одамда коронавирус қайд этилаётган эди. Мамлакатда ҳозирга қадар 71 минг одам коронавирус оқибатида вафот этган (ўтган бир суткада — 1016 нафар бемор).
Ҳиндистон аҳолисининг зичилиги ва касаллик эпицентри — Хитойга яқин бўлишига қарамай, узоқ вақтда янги касалланиш ҳолатларини минимал даражада ушлаб келаётганди. Мамлакатда баҳордаёқ қаттиқ карантин режими жорий этилган. 20 май куни Мумбай кўчаларидаги ҳаракат пандемияга қадар бўлган даврнинг 17 фоизига тушиб кетган. Таққослаш учун, Москвада ўша вақт кўчалардаги фаоллик 48 фоизни ташкил этган.
Мавзуга доир:
Аввал ҳиндистонлик эркак коронавирусдан ҳимояланиш учун ўзига 4 минг долларга тилла ниқоб ясаттиргани, Ҳиндистонда куёв ўз тўйида меҳмонларга коронавирус юқтириб вафот этгани, Ҳиндистонда юзнинг ёпиқ қисми сурати туширилган ниқоблар ишлаб чиқарила бошлагани ҳақида хабарлар берилган.
Изоҳ (0)