Август ойида ижтимоий тармоқларда Самарқанд шаҳрида эри томонидан аёвсиз калтакланаётгани акс этган аёл видеоси тарқалиб кетган эди. Кейинроқ Самарқанд вилояти ИИБ жабрланувчи Самарқанд шаҳар Термиз кўчасида яшовчи 1995 йилда туғилган Мустаҳкам, уни калтаклаган фуқаро эса аёлнинг турмуш ўртоғи, 1985 йилда туғилган Ш. исмли фуқаро эканини маълум қилди. 5 сентябрь куни ушбу ҳолат юзасидан Самарқанд шаҳар ҳокимлиги ахборот берди.
Самарқанд вилояти ИИБ ахборотида Мустаҳкам ва Ш. 2012 йили шаръий, 2015 йилда расмий (ФҲДЁ) никоҳдан ўтгани, оилавий келишмовчилик сабаб эр хотинини доимий калтаклаб, қийноққа солиб келгани таъкидланган эди. Шаҳар ҳокимлиги изоҳида таъкидланишича, «аёл бир неча йилдан бери таҳқир, хўрланишлар остида яшаб келса-да, бирор марта на маҳаллага ва на бошқа ташкилотга мурожаат қилмаган». «Шунинг учун бу оила нотинч оила сифатида рўйхатда турмайди», — дейилади ҳокимлик баёнотида.Самарқанд вилояти ИИБ аёл ва унинг икки фарзанди Самарқанд шаҳар ИИО ФМБ томонидан ҳимояга олингани, уларга «Ҳимоя ордери» берилганини маълум қилган эди. Самарқанд шаҳар маҳалла ва оилани қўллаб-қувватлаш бўлими раҳбари ўринбосари Зебинисо Раҳмонованинг таъкидлашича, руҳшунос ҳар куни жабрланувчи аёл билан мулоқот олиб бориб, тегишли муолажаларни амалга оширмоқда. «Шунингдек, унга ва фарзандларига тиббий кўмак кўрсатилиб, вақтинча яшаши учун шароит яратилган», — дейди у.
Ҳокимлик изоҳида қайд этилишича, шаҳар маъмурияти вакиллари аёлнинг оиласи, маҳалласига бориб, вазиятни ўрганган. «Оиласи, қайнона-қайнотаси келини ҳақида жуда яхши фикрда. Уларнинг айтишича, ўша куни келини огоҳлантирмай қариндошиникида қолиб кетган. Жанжал шундан келиб чиққан», — дейилади ҳокимлик ахборотида. Айни вақтда, жабрланувчи аёлга тазйиқ, таҳдидларнинг олдини олиш учун унинг қаерда яшаётгани сир сақланмоқда.
Аввалроқ жабрланувчи аёлнинг эри шов-шувли видеоёзувлар ижтимоий тармоқларда тарқалиб кетгач, уйидан қочиб кетгани, 23 август куни эса Тошкентда қўлга олиниб, Самарқандга олиб келингани ҳақида хабар берилган эди. Унга Самарқанд шаҳар ИИО ФМБ Тергов бўлими томонидан Жиноят кодексининг 105-моддаси (қасддан баданга ўртача оғир шикаст етказиш) билан жиноят иши қўзғатилган.
«Итнинг ахлатини тополмай, уч кунлик памперсни едирган»
Блогер Ақидахоним 3 сентябрь куни жабрланувчи аёл — Мустаҳкам билан жонли эфирга чиққан. Мустаҳкам интервью давомида ҳеч кими йўқлиги, эри билан бошидан бир-бирига мос бўлмагани, узоқ вақт давомида хўрлангани, оқибатда ҳатто ўз жонига қасд қилиш даражасига бориб, реанимацияга ётқизилгани ҳақида сўзлаб берган.Мустаҳкамнинг таъкидлашича, у оиладаги бундай ҳолатлар ҳақида икки бор ИИБга шикоят қилган. Биринчи сафар — ўз жонига қасд қилиб, реанимацияга тушганида ИИБ ходими келиб, аризани қабул қилган. Иккинчи сафар эса унга мажбурлаб ишлатилган болалар таглиги (памперс)ни едиришганидан сўнг ҳуқуқ-тартибот органларига арз қилган.
2017 йилмиди, ё 2018 миди, аниқ эсимда йўқ, ноябрь ойларида қайнисинглим билан ўртамизда ўзаро тортишув бўлган, шуни у (турмуш ўртоғи) билиб қолган. Ким айтганини билмайман. Шуни билиб, уйга келган, уйда ҳеч ким йўқ эди. Эшикни қулфлади. «Сен ҳали менинг синглим билан тортишасанми?», деб бошида мени урушди, урди.Ҳовлимизда Тайсон деган итимиз бор. «Итнинг ахлатини топиб кел», деди. Ҳовлида ҳамма жой супуриб-сидирилган, итнинг ахлати йўқ эди. «Йўқ экан», деб келдим. «Ҳожатхонадан ахлат олиб кел», деди. Ҳожатхона чуқур эди, ололмадик. «Ололмадим», деб айтдим. «Мен ҳозир сенга ё итнинг ахлатини едираман, ё ҳожатхонадан ахлат чиқариб, юзингга суртиб, ҳаммага шарманда қиламан, сен ҳали менинг синглим билан тортишасанми!», деди.
Адашмасам, ўзи ҳам ҳожатхона чуқуридан ахлат чиқара олмади, итнинг ҳам ахлатини топа олмади. Чиқиндилар орасидан қидирганида, уч кунлик памперс бор эди — шунинг ичини ёриб, тувакка солиб, мажбурлаб, зўравонлик билан менга едирди. «Емайман», деб кўп йиғладим. Катта ўғлим уч ё тўрт ёш эди, «Дадажон, ундай қилманг!», деб йиғлаётганди. Шу пайт у: «Йўқ, аввал ейсан, кейин чиқиб кетасан!», деб турганди.
«Емайман, емайман», деганимда графинлар билан бошимнинг орқасига ураверди, «Ейсан!», деб, мажбурлади. «Буни қандай ейман?», деганимда: «Паловни қандай қилиб қўл билан есанг, шундай ейсан», деб менга ўргатди. Уч кунлик памперснинг ҳидини ҳам гапирмаса бўлади-да. Уни ҳали оғзимга олмасимдан қайт қилгим келяпти. Йўқ, едирди — бу тарафдан қусяпман, бу тарафдан едиряпти... Худонинг зорини қилдим, ундай қилманг, деб.
Уриб-уриб едирди, қусганимни ҳам едирди. «Сен ёлғондан қусяпсан, қусганингни ҳам ейсан», деб едирганди. Ҳаммасини едириб, олдимга бир графин сувни қўйган, бир литрлик, «Ошқозонингга тушсин», деб. То ҳазм бўлгунча икки соат олдимда ўтирди. Кейин эшикларни очиб, чиқиб кетди. Шу пайт, қараяпман, мазам қоча бошлаяпти, қўл-оёғим ишдан чиқаяпти. Такси чақириб, яқиндаги қариндошимнинг уйига бордим.
Эшигидан кира солиб, ўзимдан кетганман, йиқилиб тушганман. Уларнинг айтишича, беҳуш ҳолимда фақат: «Тез ёрдамни чақиринглар», деганман. Тез ёрдамни чақиришган, дўхтирлар келиб мен билан савол-жавоб қилган, ҳушим ўзимда эмас, лекин, айтишларича, «Памперс едирди, ичимни тозаланглар», деб айтганман, кўзим юмуқ ҳолда. Улар вазиятга қараб, соат 22:30 ларда едирган бўлса, 1:00 ларда мен қариндошимнинг уйига борган бўлсам, ҳазм бўлган.
«Шифохонага олиб боргунча бу ўлиб қолади, улгурмаймиз», деб, уйнинг ўзида муолажани бошлаган врачлар. Ичимни тозалаб, олдимда уч соатми, тўрт соат ўтирди-да, эрталабгача, «ўзига келсин», деб. Шунақа бўлганди.
Мустаҳкам, эри томонидан хўрланган самарқандлик аёл
«Ҳокимлик бу оилани яраштирмоқчи»
4 сентябрь куни Ақидахоним Мустаҳкамни келинлик уйидаги оиласи (хусусан, қайнотаси) кечирим сўраш учун қидираётгани, аёлнинг айнан қаерда эканини эса фақат ИИБ, Маҳалла ва оилани қўллаб-қувватлаш бошқармаси бошлиқлари, Ёшлар ишлари агентлиги билишини ёзган. «Мустаҳкам хавотирга тушяпти, лекин хавотир олманг, ҳаммаси жойида бўлади, дедим. Мабодо кимдир уни топиб келса, у бу маълумотни қаердан олганини биламиз», — деган Ақидахоним.5 сентябрь куни Ақидахоним навбатдаги жонли эфирда Самарқанд шаҳар ҳокимлиги масъуллари, хусусан, Самарқанд шаҳар маҳалла ва оилани қўллаб-қувватлаш бўлими раҳбари ўринбосари Зебинисо Раҳмонова жабрланувчи аёлни оиласи билан яраштириш учун унга босим ўтказишни бошлагани, бунинг учун айрим масъуллар (уларнинг исмлари айтилмаган) ҳатто аёлнинг қайнотасидан пул олганини таъкидлаб ўтган.
«Сизлар шундай муаммоли оилаларни мана шу йўсинда яраштирасизлар-да, кейин эртасига ‘вой ўзини осиб қўйибди’, ‘вой ўзини машинани тагига ташлабди’, ‘вой чўкиб кетибди’ ва ҳоказо, ва ҳоказо деб юрасизлар», — дейди Ақидахоним. Блогернинг таъкидлашича, ҳокимлик вакилларининг бундай хатти-ҳаракатларини «шармандалик», ўнлаб дўконлари, Сиёб бозорининг собиқ раҳбари бўлган қайнотанинг хўрланган келини учун битта квартира олиб бермаслигини эса — «уят».
Ақидахонимнинг қўшимча қилишича, унга Самарқанд вилояти ҳокими матбуот котиби Манучеҳр Мирзаев қўнғироқ қилиб, ҳоким Мустаҳкам учун янги қурилган кўп қаватли уйлардан алоҳида квартира қилиб берилишини таъкидлаганини айтган ва ундан Мустаҳкамнинг телефон рақамини беришни сўраган. Ақидахоним рақамни бермаган, Мустаҳкамга ўзи қўнғироқ қилиб, ҳокимлик айтган манзилдан уй берилиши мумкинлигини айтган.
Бунга жавобан Мустаҳкам: «Опажон, эримнинг ўйнаши ҳам, ўша спорцмен оғайнилари ҳам, қайнисингилларим ҳам ўша ерда яшайди, мен у ерга чиқмайман», деб жавоб берган. Ақидахоним ҳам Мустаҳкамга «балки ярашарсиз?», деб савол берган. «Умуман қайтмайман, бормайман, чунки у ердан менинг ўлигим чиқади, мен болаларим учун яшашим керак», деб жавоб берган Мустаҳкам.
Ақидахонимнинг обуначилари ва ижтимоий тармоқларнинг бошқа фойдаланувчилари жабрланувчи аёл — Мустаҳкамга ёрдам кўрсатиш учун пул тўплаш ҳаракатларини бошлаган.
Изоҳ (0)