Соғлиқни сақлаш вазирлигининг бош бошқармаси бошлиғи Фарруҳ Шарипов Ўзбекистонда 5-6 кун давомида коронавирус инфекциясидан соғайиш кўрсаткичининг яхшилангани туфайли хотиржамликка берилмаслик лозимлигини қайд этди. Вазирлик вакилининг айтишича, охирги бир ҳафта давомида тез ёрдам хизматига қилинаётган кунлик мурожаатлар сони 29,3 мингдан 34,2 мингтагача ошиб кетган, деб ёзмоқда Соғлиқни сақлаш вазирлигининг ахборот хизмати.
«Сўнгги кунларда Ўзбекистонда коронавирусга чалинган беморларнинг соғайиш кўрсаткичлари ошиб бормоқда. Жумладан, 2020 йил август ойининг 2- ва 3-ўнкунлигида вазият таҳлил қилинганда, касаллик қайд қилиниши ва даволанишда, бир мунча ижобий кўрсаткичларга эришилганини кўриш мумкин.
Соғайиш кўрсаткичи сўнгги 25 кун ичида 73 фоиздан 94 фоизгача ўсиб, қарийб 18 минг нафар бемор коронавирус инфекциясидан тузалган», – дейилади хабарда.
«Ушбу ижобий кўрсаткичлардан хотиржамликка берилмаслик керак. Таҳлил этадиган бўлсак, охирги 5-6 кундаги статистикага кўра, 26 августдан бошлаб тез ёрдам хизматига мурожаатлар сони 29,3 мингдан 34,2 минггача ошган. Ушбу мурожаатларнинг ўткир респиратор билан боғлиқ чақирувларнинг сони 2,2 мингдан 3,0 мингтагача ошди. Тана ҳарорати ошгани сабаб чақирувлар эса 2,5 мингдан 3,5 мингтагача кўпайган.
Шу билан бирга, амбулатор-поликлиника муассасаларига артериал босимнинг кўтарилиши, ортиқча вазн, қандли диабет каби хасталиклар билан мурожаатлар кўпайган. Пневмония белгилари сабаб қилинган мурожаатлар сони 244 нафардан 305 нафаргача ошганлиги ҳаммани яна бир бор огоҳ, ҳушёр бўлишини, шунингдек, карантин талабларига қатъий амал қилишни тақозо қилади», – дейди Соғлиқни сақлаш вазирлиги бош бошқарма бошлиғи Фарруҳ Шарипов.
Эслатиб ўтамиз, 5 сентябрда Ўзбекистонда 295 кишида коронавирус аниқланган ҳамда даволаниш кўрсаткичи бўйича рекорд янгиланганди. Кетма-кет учинчи кун давомида янги касалланиш ҳолатлари сони 300 тага етмаган.
Изоҳ (0)