Тошкент шаҳри Олмазор туманида танишига пичоқ билан тан жароҳати етказган шахс қўлга олинди, дея хабар бермоқда шаҳар ИИББ.
Маълум қилинишича, 2020 йил 29 август куни соат тахминан 19:00 ларда, 22 ёшли М.Х. ўзининг тўрт нафар танишлари билан Олмазор тумани Очил Бобожонов кўчасидаги кафелардан бирида ўтирган вақтида таниши 24 ёшли П.Т. билан ўзаро гап талашиб қолган. Сўнгра кўчага чиқиб кўп қаватли уйларнинг олдида оғзаки можарони ҳал қилмоқчи бўлган вақтида М.Х. ўзининг ёнида бўлган пичоқ билан таниши П.Т тан жароҳатлари етказган.
Натижада П.Т. олган тан жароҳатлари билан 1-сон шаҳар клиник шифохонасига ётқизилган. Ўтказилган суд-тиббий экспертиза хулосасига кўра П.Т.га оғир тан жароҳати етказилганлиги аниқланган.
Ушбу ҳолат юзасидан Олмазор тумани ИИО ФМБ Тергов бўлинмаси томонидан М.Х.га нисбатан жиноят иши қўзғатилиб, тергов ҳаракатлари олиб борилмоқда.
Жиноят иши бўйича М.Х. Жиноят кодексининг 104-моддаси 2-қисми «e» банди (безорилик оқибатида қасддан баданга оғир шикаст етказиш) билан айбланувчи тариқасида жалб қилиниб, Жиноят процессуал кодексининг 227-моддаси (суриштирувчининг, терговчининг ёки прокурорнинг қарорига биноан ушлаб туриш) тартибида ушланган. Ҳозирда унга нисбатан эҳтиёт чорасини танлаш масаласи ҳал қилинмоқда.
Изоҳ (0)