Ижтимоий тармоқларда 2020 йилнинг ёзи бошидан буён хориждан учиб келган фуқаролар телефонларнинг IMEI кодларини рўйхатдан ўтказиш тизимида муаммоларга дуч келаётгани ҳақида хабарлар тарқалмоқда.
Вазият турлича намоён бўлмоқда — кимдир карантин муддатини ўташ чоғида паспортини меҳмонхонага топширган, кимнингдир паспорти самолёт бортида олинган. Бироқ уларнинг ҳаммаси мазкур ҳолатлардан кейин телефонларининг IMEI кодларини рўйхатдан ўтказишга уриниш чоғида уларнинг паспорт маълумотлари асосида бошқа қурилмалар рўйхатдан ўтказилганини аниқлаган. Ахборот технологиялари ва коммуникацияларни ривожлантириш вазирлиги мазкур ҳолатларга изоҳ берди.
Таъкидланишича, жисмоний шахслар учун IMEI кодларни рўйхатдан ўтказиш онлайн (веб-сайт, Ягона интерактив давлат хизматлари портали), масофавий (SMS/USSD сўровлар) ёки рўйхатдан ўтказиш пунктларига шахсан мурожаат этиш орқали амалга оширилади.
Жисмоний шахслар томонидан мобил қурилмаларнинг IMEI кодларни рўйхатдан ўтказиш учун шахснинг паспорт маълумотлари, телефон рақами ва мобил қурилманинг IMEI кодини тақдим этиш талаб қилинади. Рўйхатдан ўтказиш учун тақдим қилинаётган мобил қурилмаларнинг Ўзбекистон Давлат божхона қўмитаси томонидан ўрнатилган божсиз олиб кириш нормаларига риоя этилганлигини текшириш мақсадида шахснинг паспорт маълумотларига асосан фуқаронинг Ўзбекистон божхона чегарасини кесиб ўтганлиги тўғрисидаги маълумотлар текширилади. Ушбу ишларни амалга ошириш учун IMEI кодларини рўйхатдан ўтказиш тизими оператори ва Вазирлар Маҳкамаси ҳузуридаги Давлат персоналлаштириш маркази билан электрон ахборот алмашинуви йўлга қўйилган.
Вазирлик томонидан билдирилишича, рўйхатдан ўтказиш масофавий ёки онлайн тарзда амалга оширилаётганида фойдаланувчи билан шахс ўртасида алоқа бўлмаслиги сабабли фуқароларнинг паспорт маълумотларини айнан шу шахснинг ўзи ёки бошқа шахс томонидан тақдим қилинаётганлигини тизим орқали аниқлаш имкони бўлмайди. Шу сабабли ҳозирда учинчи шахсларнинг паспорт маълумотларидан фойдаланган ҳолда мобил қурилмалар IMEI кодларини рўйхатдан ўтказиш ҳоллари кузатилмоқда.
Маълум қилинишича, учинчи шахсларнинг паспорт маълумотларини киритган ҳолда ноқонуний равишда олиб кирилган мобил қурилмаларни рўйхатдан ўтказилиш ҳолатларининг олдини олиш ва ушбу ноқонуний ҳаракатларни амалга оширган шахсларни аниқлаш мақсадида, тизим оператори томонидан ҳуқуқни муҳофаза қилувчи органларга мурожаат қилинган. Бугунги кунда тергов-суриштурув ишлари олиб борилмоқда. Тергов-суриштирув ишлари натижалари бўйича қўшимча маълумот берилади.
Изоҳ (0)