Ўзбекистон олий ўқув юртларига кириш имтиҳонларининг 2 сентябрь куни бўлиб ўтган биринчи кунги тест синовларида жами 118 500 нафар абитуриент тест синовларида иштирок этиши керак эди. Амалда 112 188 нафар абитуриент тестда иштирок этиш учун келди. 6312 нафар абитуриент турли сабабларга кўра тестда иштирок этмади. Бу ҳақда Ички ишлар вазирининг матбуот котиби Шоҳрух Ғиёсов маълум қилди, деб ёзмоқда ЎзА.
Имтиҳонга кириш пайти текширилган 4 нафар абитуриент тана ҳарорати юқори бўлгани сабабли тестга киритилмади. Улар билан тиббиёт ходимлари шуғулланди.
Шунингдек, қайта-қайта огоҳлантиришларга қарамасдан, абитуриентлар томонидан имтиҳонга ўзлари билан турли электрон қурилмалар — мобил телефонлар, микрокалкуляторлар, қулоқчин, электрон соатлар, турли «шпаргалка»ларни олиб кириш ҳолатлари кузатилди.
Бундан ташқари, 59 нафар абитуриент тест синовидан четлаштирилди. Уларнинг 33 нафари уяли телефонларни, 4 нафари қўлбола ясалган электрон қурилмаларни яширин олиб киришга уринган. 5 нафари тана қисмларига «шпаргалка» ёпиштириб кирмоқчи бўлган. 5 та ҳолатда абитуриент ўрнига бошқа шахслар киришга уриниб кўрган, 1 та ҳолатда рухсатнома қалбакилаштирилган. 4 та ҳолатда абитуриентлар бир-бирига ёрдам бергани учун тестдан четлатилган.
Аввалроқ Ўзбекистонда бўлиб ўтаётган имтиҳонлар илк кунининг биринчи сменасида 37 нафар абитуриент тестдан четлаштирилгани, кириш имтиҳонларининг биринчи кунидаёқ телефондан фойдаланиш ҳолатлари кузатилгани ҳақида хабарлар берилганди.
Изоҳ (0)