Президентнинг афв тўғрисидаги фармонига асосан жазони ижро этиш муассасаларидан озод қилинган 6 нафар собиқ маҳкум Наманган вилоятига қайтиб келди. Бу ҳақда «Дарё» мухбири Азизбек Абдувалиев хабар бермоқда.
Вилоят ИИБ пробация бўлими бошлиғи Фарҳод Холматовга кўра, жазони ижро этиш муассасаларидан қайтганлар Наманган шаҳри, Наманган, Косонсой ва Учқўрғон туманларидан. Уларнинг ҳар бирига ижтимоий кўникма марказлари томонидан БҲМнинг 5,5—6 баробари миқдорида бир марталик моддий ёрдам кўрсатилди.
28 август, жума куни вилоят секторлари раҳбарлари афв доирасида Наманганга қайтиб келганлар билан учрашди. Учрашув давомида маҳкумларнинг ҳар бири билан алоҳида мулоқот қилинди. Улардан ҳол-аҳвол сўралиб, келгусидаги режалари билан қизиқилди. Ижтимоий ҳаётга мослашиб, жамиятда муносиб ўрин топишлари имконияти ўрганилди.
Қудратилла Сиддиқов Наманган туманидаги «Тепақўрғон» маҳалласида туғилиб ўсган, 39 ёшда.
— Бундан 12 йил аввал диний-экстремистик оқим таъсирига берилганимиз сабаб уч ака-ука қамалгандик. Мен кенжасиман. Уч йил аввал акам Собир Сиддиқов афв билан уйга қайтиб келди, энди менга шундай имконият берилди. Ҳозир катта акам Фозил Сиддиқов жазосини ўтаяпти, у киши учун ҳам ёруғ кунлар яқин деган умиддаман.
Вилоят раҳбарлари билан юзма-юз учрашганимдан хурсандман. Менга уйимизни таъмирлаб олиш учун маблағ, деҳқончилик билан шуғулланиш учун ер ажратиб бериладиган бўлди. Албатта, қилган ишимдан пушаймонман. Отадан эрта ажраганмиз, бизни оқ ювиб, оқ тараган онамнинг юзини ерга қаратдик. Энди дуоларини олиб, у киши учун тиргак бўлиш, бизга билдирилган ишончни оқлашга ҳаракат қиламан, — дейди Қудратилла.
Учрашув якунида собиқ маҳкумларнинг ҳар бирига маиший техника тақдим этилди.
Изоҳ (0)