Ўзбекистон Президент Шавкат Мирзиёев 28 август, жума куни ўтказилган видеоселектор йиғилишида мамлакатда пандемия шароитида тўйларни ўтказиш бўйича белгиланган чекловларга амал қилиш кераклигини таъкидлади. Бу ҳақда Президент матбуот хизмати хабар берди.
Йиғилишда ҳокимлар, сектор раҳбарлари ҳамда мутасадди идоралар ходимлари ҳар бир маҳаллада, жамоат жойлари, транспорт ва корхоналарда санитария талаблари бажарилиши бўйича темир интизомни таъминлаши зарурлиги айтиб ўтилди.
Қайд этилишича, тўй-маросимларни бир неча кун давомида ёки бир кунда 3—4 марта ўтказиш ҳолатларига чек қўйиш кераклиги кўрсатиб ўтилган.
Коронавирусга чалинган беморларни дунёдаги энг илғор ва ишончли усуллар билан даволаш учун барча чоралар кўрилаётгани, жумладан, ҳозирги пайтда Россия, Германия, Туркия, Хитойдан 75 нафар юқори малакали шифокор Ўзбекистонда иш олиб бораётгани таъкидланди
«Инфекцияни юқтирмаслик, аввало, ўзимизга, ўз соғлиғимизга бўлган эътиборимизга, оиламиздаги муҳитга боғлиқ. Агар ҳамма, бутун жамиятимиз тозалик, тиббий ҳимоя ва ижтимоий масофа қоидаларига амал қилса, касаллик кўпаймайди», — деди Шавкат Мирзиёев.
Эслатиб ўтамиз, Ўзбекистонда карантин юмшатилиши асносида 15 августдан бошлаб 30 кишилик тўйлар ўтказилишига рухсат берилган.
Шавкат Мирзиёев 12 август куни бўлиб ўтган йиғилишда аҳолини тўй ўтказишда белгиланган талабларга риоя этишга чақирганди. Шундан сўнг Бухорода карантин қоидаларини бузиб, 150 кишилик тўй қилган фуқарога қарийб 4,5 миллион сўм жарима белгилангани ҳақида хабар берилди.
Маълумот учун, Ўзбекистонда коронавирус эпидемияси тарқалишининг олдини олиш мақсадида 23 мартдан эътиборан оммавий тадбирлар, хусусан, тўй-маросимларнинг ўтказилиши тақиқланган эди. Ушбу тақиқдан сўнг тўй маросимларини ўтказишга уринганларга нисбатан ҳатто жиноят иши ҳам қўзғатилди. Мамлакатда эпидемиологик вазият барқарорлашиб, нисбатан назорат остига олингач, Республика махсус комиссиясининг 30 майдаги қарори билан «яшил» тоифага киритилган ҳудудларда оилавий тантана, тўй, маърака ва маросимларни 30 кишидан кўп бўлмаган ҳолда ўтказишга рухсат берилганди.
Мамлакатда коронавирус билан боғлиқ вазият кескинлашаётгани сабабли 10 июлдан бошлаб мамлакатда тўйларни ўтказиш яна тақиқланганди.
Изоҳ (0)