Президент Шавкат Мирзиёев томонидан 26 август куни имзоланган «Аҳолини ижтимоий қўллаб-қувватлашга қаратилган қўшимча чора-тадбирлар тўғрисида»ги қарорига асосан, 16 ёшга тўлмаган 810 мингдан ортиқ болага 500 минг сўмлик ёрдам пули берилиши ҳақида аввалроқ хабар қилинганди.
Шавкат Мирзиёев расилигида 28 август куни ўтказилган йиғилишда маълум қилинишича, мазкур ёрдам пули болаларнинг нафақасига қўшиб тўланади.
Қарорга кўра, кўмакка муҳтож оилаларнинг болаларини қишки кийим-бош, мактаб формаси ва ўқув қуроллари билан таъминлаш мақсадида «темир дафтар»га киритилган, боқувчисини йўқотган ва ногиронлиги бўлган 16 ёшга тўлмаган болаларга 500 минг сўмдан ёрдам пули берилади. Ушбу моддий ёрдам билан жами 810 мингдан зиёд бола қамраб олинади. Бунинг учун 400 миллиард сўмдан ортиқ бюджет маблағлари ажратилди.
Маълум қилинишича, боқувчисини йўқотган оилалардаги ва ногиронлиги бўлган 16 ёшга тўлмаган болалар бўйича аниқ ҳисоб-китоблар мавжуд бўлиб, тўловлар Пенсия жамғармаси томонидан пенсия ва нафақага қўшиб берилади.
Маҳалла ва оилани қўллаб-қувватлаш вазирлиги, ҳокимлар ҳамда сектор раҳбарларига ёрдам пулларини муҳтож оилаларга адолатли, очиқ ва тўғри етказиб бериш, ҳеч кимни эътиборсиз қолдирмаслик юзасидан топшириқлар берилди. Аҳоли билан учрашиб, ушбу маблағлар ҳақиқатда ёрдамга муҳтож болаларнинг баркамол ривожланиши ва соғлиғи учун сарфланиши зарурлигини тушунтириш вазифаси қўйилди.
Эслатиб ўтамиз, Қурбон ҳайити байрами арафасида республика бюджетидан «Саховат ва кўмак» жамғармаси орқали 150 минг оила 1 миллион сўмдан моддий ёрдам олганди. Шунингдек, 15 августгача 400 мингдан кўпроқ оиланинг ҳар бир аъзоси учун 220 минг сўм миқдорида моддий ёрдам берилиши белгиланганди. Кейинроқ яна 150 мингдан ортиқ оила моддий ёрдам олиши маълум бўлди.
Изоҳ (0)