Жаҳон банки мамлакатларда бизнес юритиш учун яратилган шароитлар баҳоланадиган Doing Business рейтингини эълон қилишни вақтинча тўхтатишга қарор қилди. Бу ҳақда ташкилот сайтида маълум қилинган.
Жаҳон банки сўнгги беш йиллик рейтинг натижаларини текшириб чиқади. Ушбу текширув билан Жаҳон банкининг мустақил ички аудит гуруҳи шуғулланади. «Олинган натижалар асосида иш тутиб, номувофиқлардан энг кўп зарар кўрган мамлакатларнинг маълумотларини ретроспектив тарзда тўғрилаб қўямиз», — дейилади ташкилот хабарида.
Ўзбекистонда Doing Business рейтингига катта эътибор берилади. Мамлакатнинг ушбу рейтингда ўринини яхшилаш учун 2018 йилдан буён олтита ҳужжат қабул қилинган. Хусусан, Президент Шавкат Мирзиёев 2018 йилнинг ёзида Doing Business’да Ўзбекистоннинг рейтингини ошириш тўғрисида қарор имзолаган эди. Молия вазири ўринбосари Одил Исоқов ушбу рейтинг бўйича яхши натижаларга эришилса, хорижий инвесторларни жалб қилишга ёрдам беришини айтганди.
Doing Business 2020 рейтингида Ўзбекистон 190 та давлат ичида 69-ўринни эгаллади. Мамлакат ўтган йилги рейтингга нисбатан 7 поғонага кўтарилиб, Индонезия ва Люксембургни ортда қолдирди.
Изоҳ (0)