Қашқадарёда коронавирус асоратларидан вафот этганлар 10 нафарга етди

Қашқадарё вилояти коронавирус қурбонлари сони бўйича Ўзбекистонда 3-ўринга чиқиб олди.

Соғлиқни сақлаш вазирлиги 27 август куни Қашқадарё вилоятида икки нафар эркак вафот этганини хабар қилди. Касби туманида яшовчи 45 ёшли Ғ.Ҳ. ва Миришкор туманида яшовчи 36 ёшли Қ.Р. исмли эркаклар вафот этган. Беморлар айнан қайси куни вафот этганига аниқлик киритилмаган.

Қашқадарёдаги коронавируснинг илк қурбони ҳақида ССВ 1 июль куни ахборот берганди, аммо унинг ўлими аслида 29 июнь куни рўй бергани кейинроқ маълум бўлганди. Янги ўлим ҳолатларидан сўнг Қашқадарёда коронавирус қурбонлари сони 10 нафарга етди.

Ҳозирда ССВ жадвалига кўра, Қашқадарё вилояти коронавирус қурбонлари сони бўйича Тошкент шаҳри (205 қурбон) ва Тошкент вилоятидан (34 қурбон) сўнг учинчи ўринга чиқиб олди. Кейинги ўриндаги Бухорода 8 киши вафот этган.

Вилоятда коронавирусга чалинганларнинг умумий сони 27 август 17:00 ҳолатига кўра 927 нафарни ташкил этмоқда. Касалланганларнинг 881 нафари соғайган.