Жиноят ишлари бўйича Тошкент шаҳар суди дизайнер Наримон Олимжонов (Наримон Григорян)ни қасддан ўлдиришда айбланаётган судланувчига нисбатан ҳукм чиқарди, деб хабар қилди Олий суд матбуот хизмати.
Маълум қилинишича, судланувчи Б.Буркитбаев (1996 йилда, Тошкент вилоятида туғилган, Ўзбекистон фуқароси, илгари судланмаган) Жиноят кодексининг 97-моддаси (қасддан одам ўлдириш) ва бошқа моддаларида назарда тутилган жиноятларни содир этганликда айбдор деб топилган.
Суднинг 14 августдаги ҳукми билан Б.Буркитбаев 18 йилга озодликдан маҳрум этилган. Суд тайинланган жазонинг умумий режимдаги колонияларда ўташ муддатини белгилаб берган.
Эслатиб ўтамиз, дизайнер Наримон Григорян январь ойида ижара шартномаси асосида яшаб келган Яшнобод туманидаги уйида ўлдирилган эди. Унинг ўлимидан сўнг Бош прокуратура дизайнернинг қонли жасади тасвирланган видеони эълон қилган. Бироз ўтиб, видео тармоқдан ўчирилган ва Бош прокуратура ҳолат юзасидан узр сўраган. Бир қанча вақт ўтиб эса Бош прокуратура эълон қилинган видео Наримон Григорянга тегишли эмаслигини маълум қилган.
Кейинроқ Наримон Григоряннинг ўлими тафсилотлари очиқланган.
Изоҳ (0)