Ўзбекистонда карантин юмшатилгани билан тиббий ниқоб тақиш асосий талаб бўлиб қолаётгани айтилди

Коронавирусга қарши кураш штаби аъзоси Ҳабибулло Оқилов карантин чоралари юмшатилган бўлса ҳам тиббий ниқоб тақиш асосий талаблардан бўлиб қолаётганини билдирди.

Жумладан, аҳолидан келган саволлардан бирида ниқоб тақиш талабининг ҳозирги кундаги ҳолати ва унинг назорати кимларга юклатилгани борасида сўралган.

Тиббий ниқоб тақилиши бўйича талаб бекор қилинмаган. Аксинча, тиббий ниқоб тақиш, ижтимоий масофа сақлаш ва гигиеник талабларга риоя қилиш асосий талаблар бўлиб қолмоқда. Эпидемиологик осойишталик агентлиги ходимлари ички ишлар ва миллий гвардия ходимлари билан биргаликда тизимли равишда рейдлар ўтказиши кўзда тутилган ва талабларга риоя этмаслик учун маъмурий жазолар белгиланган.

Ҳабибулло Оқилов, Коронавирусга қарши кураш штаби аъзоси

Эслатиб ўтамиз, Ўзбекистонда коронавирус билан боғлиқ вазиятнинг кескинлашгани сабабли 10 июлдан 1 августгача мамлакатда қатъий карантин чоралари жорий қилинган, 10 июлдан тўйлар, оилавий ва оммавий тадбирлар тақиқланиб, автотранспорт ҳаракати чекланган, кейинроқ карантин чекловлари 15 августга қадар узайтирилган эди. 15 августдан бошлаб эса чекловлар юмшатилган эди. Бироқ Республика махсус комиссияси 15 августдан кейин ҳам бир қатор карантин чекловлари сақлаб қолинишини билдирган ва унда «фуқароларнинг жамоат жойларида ижтимоий масофани (2 метр) сақлаши, тиббий ниқобда бўлиши. Бунда улар томонидан санитар талаблар бузилган тақдирда қатъий чоралар (жаримага тортиш) кўрилади», дея қайд этилган.