Тошкент вилояти Бўстонлиқ туманига Жўрабек Аҳмедов ҳоким этиб тайинланди. Бу ҳақда Тошкент вилояти ҳокимлиги матбуот хизмати хабар берди.
Вилоят ҳокимлигининг хабар беришича, 27 август куни туман Халқ депутатлари кенгашининг навбатдан ташқари сессияси бўлиб ўтди. Унда туман депутатлари томонидан Бўстонлиқ туман ҳокими лавозимига Жўрабек Аҳмедовнинг номзоди кўриб чиқилди ва туманга ҳоким этиб тайинланди.
Мазкур тайинловга қадар Жўрабек Аҳмедов Туризмни ривожлантириш давлат қўмитасининг Инвестицияларни жалб қилиш ва туризм инфратузилмасини ривожлантириш департаменти бошлиғи лавозимида ишлаб келаётган эди.
Бўстонлиқ туманига 2018 йилдан буён Ғайрат Мадаминов ҳокимлик қилаётганди. 2020 йил август ойи ўрталарида Шавкат Мирзиёев Тошкент вилояти Бўстонлиқ туманининг туризм салоҳияти жуда юқорилигига қарамасдан, узоқ йиллар давомида бундан етарлича фойдаланилмаганини таъкидлаганди.
Шу сабабли, давлат раҳбари ушбу ҳудудни тўлиқ туристик зона сифатида ривожлантириш ва режадаги лойиҳаларни муваффақиятли амалга ошириш мақсадида бош вазир ўринбосари — Туризмни ривожлантириш давлат қўмитаси раисига (ҳозирда бу лавозимни Азиз Абдухакимов эгаллаб турибди) параллел равишда, янги тажриба тариқасида Бўстонлиқ туманига раҳбарлик вазифасини юклатиш таклифини берганди.
Изоҳ (0)