АҚШнинг Висконсин штатидаги Кеноша шаҳрида 23 август, якшанба куни икки нафар полициячи 29 ёшли қора танли эркакни жиддий жароҳатлади, деб хабар бермоқда Meduza.
Гувоҳлардан бири воқеани тасвирга олган. Видеода қора танли эркак машинанинг ҳайдовчи ўриндиғи томонга кетаётгани кўринган. Эркакнинг ортидан икки нафар полициячи унга тўппонча қаратган ҳолда борган. Улар эркакдан ниманидир талаб қилган. Эркак машина эшигини очганда, полициячилардан бири унинг майкасидан ушлаб, унинг орқасига қарата етти марта ўқ узган. Машина олдида турган аёллар қичқирган.
https://twitter.com/AttorneyCrump/status/1297721479711334401
Воқеа жойига дарҳол қўшнилар тўплана бошлаган. Уларга бошқа туманлар аҳолиси ва афроамерикаликлар ҳуқуқларини ҳимоя қилиш ҳаракатлари фаоллари қўшилган. Тахминан 100 нафар намойишчи шаҳар полицияси идораси томонга ҳаракатланган ва тўсиққа дуч келган. Шаҳар расмийлари соат 22:00 дан бошлаб комендантлик соати жорий қилган, бироқ норозиликлар ярим тунгача давом этган. Норозилик иштирокчилари чиқинди ташийдиган учта машинани ёқиб юборган, бир нечта офиснинг деразаларини синдирган, суд биносига граффитилар чизган. 24 август куни норозиликлар қайта бошланган, бир нечта бино ёқиб юборилган. Кеношага АҚШ Миллий гвардияси қўшинлари киритилган. Бошқа бир нечта шаҳарда ҳам намойишчилар кўчаларга чиққан.
Жароҳатланиши норозилик намойишларига сабаб бўлган Жейкоб Блейк оғир аҳволда Милуоки шаҳар касалхонасига олиб борилган. У операция қилинган, аҳволи барқарор ва жонлантириш бўлимида ётибди. Висконсин штати адлия департаменти тергов бошлаган. Воқеа жойида бўлган икки нафар (бошқа маълумотларга кўра, уч нафар) полициячи хизматдан четлатилган. Расмийлар уларнинг исмларини маълум қилмаган, шунингдек, отишмадан олдин нима бўлгани ҳақида ҳам хабар берилмаган. Маълум бўлгани шуки, полиция оилавий жанжал сабабли чақирув бўйича келган.
Блейкнинг оиласи адвокат сифатида полиция зўравонлиги ишлари билан танилган Бенжамин Крампни ёллаган. Крампнинг маълум қилишича, Блейк оилавий жанжални тинчлантиришга ёрдам берган, бироқ полициячилар унга қурол ўқталган ва электрошокер билан урган. Ўқ Блейк ўз машинасида бўлган уч нафар ўғлидан (Блейкнинг олти нафар фарзанди бор) хабар олиш учун борганда узилган. Эркакнинг уч, беш ва саккиз ёшли ўғиллари отасига ўқ узилганини кўрган. «Бу улар учун бир умрлик жароҳат бўлиб қолади», — дея маълум қилган адвокат.
Крампнинг сўзларини гувоҳлар ҳам тасдиқлаган. Уларнинг маълум қилишича, Блейк икки аёл ўртасидаги жанжални тўхтатишга уринган, полициячилар эса электрошокер қўллаган ва ўқ узган. Воқеани видеога олган Рейзин Уайтнинг маълум қилишича, Блейк машинада етиб келган ва майса устида ўтирган ўғлининг олдига борган. У ўғлига машинага минишни айтган ва ўзи уйга кириб кетган. Шу пайтда Уайт деразадан узоқлашган, қайтиб келганида эса полициячилар Блейкнинг бўйнидан ушлаб турганини, уни ураётгани ва электрошокер ишлатаётганини кўрган. Блейк полициячилар қўлидан қутулиб чиққан ва машина томонга юрган. Шу пайтда Уайт тасвирга олишни бошлаган.
Блейкни даволаш ва юридик ёрдам учун бир суткада 650 минг доллар тўпланган. Қўшиқчи Карди Би, рэпер 50 Cент, баскетболчи Леброн Жеймс ва бошқа машҳурлар полиция зўравонлигини тўхтатишни талаб қилган. Бир нечта демократ сиёсатчилар, шу жумладан, АҚШ президентлигига номзод Жо Байден Кеноша полицияси ҳаракатларини қоралаган. Висконсин губернатори Тони Иверс полиция томонидан куч ишлатилишини тартибга солувчи қонунлар тўпламини қабул қилиш учун штат қонунчилик мажлисининг шошилинч сессиясини чақирган.
АҚШда доимий равишда ирқчилик ва полиция зўравонлигига қарши намойишлар бўлиб туради. Сўнгги йиллардаги энг йирик намойишлар 2020 йил май ойининг охирида Жорж Флойднинг ўлимидан кейин юз берган кўча намойишлари бўлди. Намойишлар мамлакатнинг кўплаб шаҳарларида Black Lives Matter ҳаракати доирасида бўлиб ўтди. Асосан тинч намойишлар бўлиб ўтди, бироқ баъзи намойишларда дўконларга ҳужумлар ва колония даври ёдгорликларига зарар етказиш кузатилди. Намойишчиларнинг полиция билан тўқнашувлари ҳам бўлиб ўтди. Кейинроқ Black Lives Matter ҳаракати ва ирқчиликка қарши норозликлар дунёнинг бошқа мамлакатларига ҳам тарқалди.
Изоҳ (0)