The Financial Times: АҚШ ҳукумати Буюк Британия вакцинасини жорий этишни тезлаштирмоқчи

АҚШ президенти Дональд Трамп администрацияси мамлакатда Буюк Британияда ишлаб чиқилаётган коронавирусга қарши вакцинани тезкорлик билан жорий этиш имкониятини кўриб чиқмоқда. Бу ҳақда учта манбага таяниб, The Financial Times хабар бермоқда.

Газета маълумотларига кўра, ҳукумат АҚШнинг Озиқ-овқат маҳсулотлари ва дори воситалари сифати бўйича санитария назорати бошқармаси (FDA) уни қўллаш бўйича фавқулодда рухсатнома беришини (EUА) буни амалга оширишнинг вариантларидан бири сифатида қарамоқда.

Бундай ҳолда FDA Оксфорд университети AstraZeneca компанияси билан биргаликда ишлаб чиқаётган препарат бойича тадқиқотлар натижаларига кўра қарор қабул қилиши керак бўлади. Агар у муваффақиятли бўлса, вакцинадан АҚШда фойдаланиш учун октябрь ойидаёқ президент сайловларига қадар рухсат берилади.

The Financial Times’нинг ёзишича, АҚШда вакцинани жадал жорий этилиши мумкинлиги ҳақида Оқ уй аппарати раҳбари Марк Медоуз ва молия вазири Стивен Мнучин июль ойи охирларида вакиллар палатаси спикери Нэнси Пелоси билан бўлган учрашувда эълон қилган. Нашрнинг манбаларига кўра, учрашувда гап AstraZeneca препарати ҳақида борган, шунингдек, EUА механизми муҳокама қилинган.

Мнучин вакили The Financial Times’га вазир AstraZeneca препарати ҳақида ҳеч нарса демагани ва FDA’нинг қандайдир вакцинани фавқулодда жорий этиш билан боғлиқ режалари тўғрисида ҳеч қандай маълумотга эга эмаслигини билдирган. Оқ уй эса вазиятга изоҳ бермаган.

Трамп вакцинани тасдиқлашни тезлаштириш мақсадида FDA’га босим ўтказиши мумкинлиги ҳақида New York Times ҳам ёзган. Газета маълумотларига кўра, апрель ойида мамлакат Соғлиқни сақлаш вазирлиги президент администрацияси учун дастур тақдимотини тайёрлаган бўлиб, унда коронавируснинг тарқалиши билан боғлиқ вазиятни назорат қилишнинг энг яхши йўли вакцинани тезда ишлаб чиқиш ва уни октябрда кенг оммага етказиш эканлиги айтилган. New York Times унинг муддати кечиктирилгани ва АҚШ ҳукумати вакцинанинг миллионта дозасини 2020 йил охири ёки 2021 йил бошида ишлаб чиқаришни мақсад қилганини қайд этган.

Дональд Трампнинг ўзи эса COVID-19’га қарши вакцина мамлакатдаги президентлик сайловларига қадар ишлаб чиқилишини билдирган, лекин унда АҚШда ишлаб чиқилаётган препарат ҳақида гап кетган.