Facebook асосчиси Марк Цукерберг Оқ уйнинг АҚШ фуқароларига TikTok’ка эгалик қилувчи ByteDance компанияси билан битим имзолашни тақиқловчи қарорига таъсир кўрсатган бўлиши мумкин, деб ёзади The Wall Street Journal.
Маълумотларга кўра, Цукерберг 2019 йилнинг октябрида Ой уйдаги кечки овқат вақтида АҚШ президенти Дональд Трампга Хитой технологик компанияларининг ўсиб кетиши Америка бизнесига хавф туғдириши ҳақида гапирган. Ўшанда Цукерберг Хитой компаниялари ҳукумат учун Facebook’дан кўра каттароқ муаммо эканлигини айтиб ўтган.
WSJ’нинг ёзишича, 2019 йилнинг ноябрида Жоржтаун университети талабалари қаршисида чиқиш қилган Цукерберг TikTok Facebook’нинг сўз эркинлиги бўйича мажбуриятларини бўлишмаслиги ҳамда АҚШ қадриятлари ва технологик устунлигига таҳдид солишини маълум қилган. Шунингдек, Цукерберг америкалик амалдорлар ва конгрессменлар билан мулоқоти вақтида ҳам TikTok ҳақида гапирган.
Оқ уй қошидаги Савдо бўйича миллий кенгаш раҳбари Питер Наварронинг сўзларига кўра, Цукербергда TikTok масаласига таъсир кўрсатиш имконияти йўқ ва WSJ’нинг мақоласи ишончли эмас. Facebook вакили эса ўз навбатида Цукерберг ҳеч қачон TikTok’га қарши чиқиш қилмаганини билдирган.
Эслатиб ўтамиз, август бошларида президент Трамп TikTok’ни АҚШ ҳудудида тақиқламоқчи эканлигини маълум қилган эди. Microsoft TikTok’ни тўлиқ сотиб олиш учун ByteDance билан музокаралар олиб бораётган эди, лекин Трампнинг мамлакатда бу тармоқни тақиқлаш ниятида эканидан сўнг музокаралар вақтинча тўхтатилди.
Изоҳ (0)