Украина Президенти Владимир Зеленский Euronews телеканалига берган интервьюсида Беларусь Президенти Александр Лукашенконинг ўрнида бўлганида мамлакатдаги инқирозни ҳал қилиш учун янги президентлик сайловларини ўтказган бўлишини айтди. Бу ҳақда Meduza хабар берди.
«Келинг, тасаввур қилайлик, мен ўзимга ва одамларнинг танловига ишонаман. Мен ишончли одамман. Қандай қилиб барчани тинчлантириш мумкин? Бунинг учун мен бир ойдан кейин янги сайловлар бўлишини айтаман. Истаган одам унда қатнашади. Барчани сайловга таклиф қиламан ва мен Беларусь халқига марҳамат, сайланг, дейман.
Бундай сайлов натижасидан сўнг ҳеч кимда савол қолмайди. Мен бунга аминман. Агар Александр Григоревич ғалаба қозонганида эди, у ғолиб деб тан олинарди. Агар бошқаси ғалаба қозонса, демак, ўша ғолиб чиқарди. Аммо ҳамма нарса қон тўкишсиз, ҳалоллик ҳамда осойишталик билан бўлар ва тарихга кирар эди», – деди Зеленский интервьюсида.
Беларусь Ташқи ишлар вазирлиги матбуот котиби Анатолий Глаз Зеленскийнинг юқоридаги фикрларига жавобан Украина раҳбарияти кўп йиллардан буён қўшниларига маслаҳат беришдан кўра, ўз мамлакати ичида ҳал қилиниши керак бўлган жуда кўп муҳим муаммолар билан шуғулланишини айтиб ўтган.
Эслатиб ўтамиз, Беларусдаги президентлик сайловлари 9 август куни ўтказилган. МСК маълумотига кўра Лукашенко 80,1 фоиз овоз билан сайловларда ғолиб деб топилган. У мамлакатни 26 йилдан буён бошқариб келмоқда. Сайлов куни Минск марказида ҳарбий техника пайдо бўлган.
Беларусь милицияси сайлов участкалари олдида тўпланган одамларни қўлга олди. Сайлов куни оқшомида мамлакатнинг барча етакчи оммавий ахборот воситаларининг сайтлари очилмай қолди. Пойтахт Минскда президент сайловидан кейин норозилик намойиши бошланди. Шундан буён мамлакатда норозилик намойишлари ва намойишчиларни қўллаб-қувватлаш учун чиқишлар давом этмоқда.
Мавзуга доир: Беларусда нима гап? 23 августнинг асосий воқеалари
Изоҳ (0)