Дональд Трамп Goodyear шиналарига бойкот эълон қилди. Президент лимузинидаги шиналар ҳам худди шу компанияники

АҚШ президенти Дональд Трамп ўзининг Twitter’даги саҳифаси орқали Goodyear шиналар маркасига бойкот эълон қилиб, унинг маҳсулотларини харид қилмасликка чақирди. Америка етакчисининг ғазабига компания раҳбарияти ўз ходимларига «Американи яна буюк қиламиз» ёзуви туширилган кепкаларни кийишни тақиқлагани сабаб бўлган.

Америка ОАВларида Goodyear компанияси раҳбарияти бағрикенглик бўйича ўтказилган корпоратив тренинг вақтида ўз ходимларининг «Американи яна буюк қиламиз» чақирувидан фойдаланишни тақиқлаган. Шу сабабли корхонада Трампнинг шиори туширилган кепкалар тақиққа учраган.

Бундан хабар топган Дональд Трамп шина ишлаб чиқарувчи номига кескин фикр билдириб, ўз тарафдорларини Goodyear маҳсулотларини харид қилмасликка ва арзонроқ нарх эвазига сифатлироқ «покришка» танловини амалга оширишга чақирган. Ўз навбатида президент тез орада ўзининг Cadillac One лимузинига ўрнатилган Goodyear шиналарини бошқасига алмаштиришга ваъда берган.

Goodyear вакиллари можароли тақдимотга алоқадор эмасликларини, бироқ ўз ходимларидан иш жойида сиёсий қарашларидан воз кечишни сўраётганликларини яширмаган. Расмий раддияга қарамай, шина компаниясининг акциялари Америка президентининг баёнотидан сўнг тушиб кетган.

Эслатиб ўтамиз, 2017 йилда Калифорния штатидан Конгрессга сайланган демократ Жеки Спиир Дональд Трампга Twitter’даги саҳифасида ёзув қолдиришни ман этувчи қонун лойиҳасини киритиш ниятини маълум қилганди.