Болтиқ машинасозлик компаниясининг россиялик муҳандислари куч тузилмалари учун тўлиқ узатмали амфибияни яратди. «Қораялоқ» номини олган машина сув ва қуруқликда ҳаракатлана олади, деб хабар беради Motor.
Амфибия корпуси композит материаллардан ишланган ва миналардан ҳимояланган. Муҳандислар углепластикдан фойдаланиш эвазига машина оғирлигини 2000 килограммга туширишга эришган. Шу билан бирга, «Қораялоқ»нинг максимал юк кўтариш қобилияти 1,5 тоннага тенг.
Универсал модул платформаси эвазига Россиянинг янги амфибияси қуруқликда соатига 100 километр, сувда эса 70 километр тезликда ҳаракатлана олади. Бундан ташқари, амфибия 1,25 метрга етадиган сув тўлқинларида ҳам сузишга қодир. Машинага ўз функциясини ўзгартириши учун 12 сония етади. Бу вақт ичида «Қораялоқ» қирғоққа чиқиб, ғилдираклари ёрдамида ҳаракатланишга киришиб кета олади.
Тўлиқ узатмали амфибияга 260 от кучига эга дизель мотор ўрнатилган бўлиб, у уч поғонали автомат узатмалар қутиси ёрдамида бошқарилади. Машина 30 даража бурчак ва баландлиги 1,5 метргача бўлган тўсиқларни босиб ўта олади. «Қораялоқ» тўлиқ ёқилғи баки билан қуруқликда 800 километр, сувда эса 300 километр йўл босиб ўтишга қодир.
Амфибия мураккаб ва оғир иқлим шароитларида ҳаракатланиш учун мўлалланган. Айни вақтда автомобиль синовдан ўтказилмоқда.
Аввалроқ россиялик блогерлар Lada XRay автомобилини сувда сузишга мослаштиргани тўғрисида хабар берилганди.
Изоҳ (0)