Фарғона вилояти Тошлоқ туманида Damas ва «ИЖ» мотоцикли тўқнашуви оқибатида ҳайдовчилардан бири вафот этди. Бу ҳақда Фарғона вилояти ИИБ ахборот хизмати хабар қилди.
Воқеа 2020 йил 17 август куни Тошлоқ туманида содир бўлган. Э.Х. бошқарувидаги Damas «Яккатут» МФЙ ҳудудида ўзига қарама-қарши йўналишда «ИЖ» мотоциклида келаётган А.Т.ни уриб юборган. Йўл транспорт ҳодисаси оқибатида мотоцикл ҳайдовчиси жиддий жароҳат олган ва шифохонада ҳаётдан кўз юмган.
Ҳолат юзасидан Тошлоқ тумани ИИБ ҳузуридаги тергов бўлинмаси томонидан Жиноят кодексининг 266-моддаси 2-қисми (транспорт воситалари ҳаракати ёки улардан фойдаланиш хавфсизлиги қоидаларини бузиш, мазкур қилмишнинг одам ўлимига сабаб бўлиши) билан жиноят иши қўзғатилиб, тергов ҳаракатлари олиб борилмоқда.
Фарғона вилоятининг Тошлоқ туманида одам ўлими билан боғлиқ ЙТҲлар содир бўлиб туради, жумладан, 12 июнь куни Н.А. бошқарувидаги «ГАЗ-53» йўлни белгиланмаган жойидан кесиб ўтаётган пиёда, 2015 йилда туғилган Э.М.ни уриб юборган ва 5 ёшли бола шифохонада вафот этган. 10 июль куни фуқаро У.Т. Nexia 2 автомашинасини тумандаги «Қанжирға» маҳалласи ҳудудида бошқариб кетаётиб, бошқарувни йўқотган ва йўлнинг ўнг томонидаги тут дарахтига урилган. Фуқаро тўқнашув оқибатида оғир жароҳат олиб, воқеа жойида ҳалок бўлган.
Мотоцикл ҳайдовчиларининг ўлими билан боғлиқ воқеалар ҳақида ҳам хабарлар берилган. 2019 йил декабрда Қорақалпоғистоннинг Тахтакўпир туманида Фавқулодда вазиятлар вазирлигига қарашли Тахтакўпир тумани Ёнғин хавфсизлиги бўлинмасида катта инспектори машинасида мотоцикл ҳайдовчисини уриб юборган ва Б.Пирназаров воқеа жойида вафот этган.
Шунингдек, Тошкент шаҳрида 2020 йил 26 июнь куни 35 ёшли Б.С. бошқарувидаги Yamaha ЙЗФР6 русумли мотоцикл ва 46 ёшли Х.У. бошқарган Shacman юк автомобили ўзаро тўқнашув содир этиши оқибатида мотоцикл ҳайдовчиси тан жароҳатлари олиб, воқеа жойида ҳаётдан кўз юмган.
Изоҳ (0)