Хитой автомобиль саноати коронавирус пандемияси сабаб бошқа давлатлардаги каби жиддий жабр кўрди, бироқ бир-бирининг ортидан янги моделларни тақдим этиб, «оёққа туриб олишга» уринмоқда. Бу сафарги янгилик — Bestune E01 электромобили, деб хабар беради CARakoom.
Bestune бу — First Auto Works (FAW) компаниясининг бренди бўлиб, бунга қадар Besturn деб номланган. Ташқи кўриниши билан янги E1 кроссовери узун капоти ва ингичка фаралари билан ажралиб туради.
Бир қарашда кишининг эътиборини ўзига жалб этадиган жиҳатларидан эшикларда ажралиб турувчи бурмалар, шунингдек, эшик тутқичлари ва аэродинамик ғилдирак дискалари ўрин олган. Машина ўлчами 4639х1880х1640 миллиметрни ташкил этади. Ғилдирак базаси — 2810 миллиметр, оғирлиги 1810 килограмм бўлиб, беш кишилик ўринга эга.
Салон ичи анча қизиқарли. Олд панелнинг юқори қисмига кристалл шаклидаги ноодатий элемент ўрнатилган бўлиб, унда митти голографик ёрдамчи жойлашган. Мижозларда турли голографик шаклларни танлаш имконияти эга.
Бундан ташқари, Bestune E01 катта марказий мултимедиа тизимига ҳамда тўлиқ рақамли қурилмалар комбинациясига эга. Салонда учинчи сенсор ҳам бўлиб, унинг ёрдамида автомобилнинг иқлим-назорат каби турли функцияларини бошқариш мумкин.
E01 190 от кучи ва 320 Нм айланувчи моментга эга электромотор ёрдамида ҳаракатга келади. Энергия унга 61,34 кВТ/соатли аккумулятор батареясидан келади. Машинанинг максимал тезлиги 170 км/соат, бир марта қувватланиш орқали эса 450 километр йўл босишга қодир.
Изоҳ (0)