Чикагода содир бўлган кучли шамол оқибатида дарахт 2011 йилда ишлаб чиқарилган Subaru Forester устига келиб қулади. Қайта тиклашга яроқсиз бўлган кроссоверни унинг эгалари ташлаб юбориш ўрнига, арт-объектга айлантиришга қарор қилди, деб хабар беради Motor.
Жо Мазримас ва Даяна Левиттнинг сўзларига кўра, бўрон пайти улар кучли шамол ва момақалдироқ овозини эшитган. Бироқ ноқулай об-ҳаво шароити уларнинг ҳаётига таъсир кўрсатиши мумкинлиги ҳақида ўйлаб кўрмаган. Бўрондан сўнг ойнадан ташқарига қараган эр-хотин Subaru Forester томида улкан дарахт ётганини кўрган.
Пачоқланган Forester эгалари автомобилни чиқиндига бериб юборишга қарор қилган. Бироқ суғурта компанияси вакилини кутиш асносида уларнинг миясида яксон этилган автомобилни ёдгорликка айлантириб, қўшниларининг кўнглини кўтариш фикри пайдо бўлган. Жуфтлик узоқ ўйланиб ўтирмай, машинани утилизация қилмасдан, уни «абадийлаштириш»га қарор қилган.
Эр-хотин автомобиль ёнига QR-код ҳам ўрнатган бўлиб, йўловчилар унинг ёрдамида коммунал хизмати ходимлари қулаган дарахтни қай тарзда олиб ташлагани тасвирланган видеони томоша қилишлари мумкин. Жо ва Даянанинг ўзи кўча санъати намунасини «Бўса» деб номлаган.
Изоҳ (0)