Беларусдаги Гродно шаҳри расмийлари милиция ҳаракатлари учун узр сўради ва митинг ўтказишга рухсат берди

Беларусдаги Гродно шаҳри расмийлари шаҳар марказида митинг ўтказишга расман рухсат берди, деб хабар бермоқда Meduza. Депутатлар кенгаши ва шаҳар ижроия қўмитасининг тегишли мурожаатлари ижроия қўмитаси сайтида эълон қилинган

Қайд этилишича, ижроия қўмитаси намойишчиларга тиббий ва техник ёрдам кўрсатишга ва мухолифат ва касаба уюшма вакилларининг маҳаллий телевидениега киришини таъминлашга ваъда берди. Расмийлар корхона раҳбарларига иш ташлашларда қатнашган ишчиларга босим ўтказишга йўл қўйилмаслиги ҳақида кўрсатма беради.

Шунингдек, митингда ҳибсга олинганларнинг барчаси қўйиб юборилгани ва шаҳар милицияси раҳбарияти улардан оммавий узр сўрагани таъкидланган.

Эслатиб ўтамиз,  Беларусда 9 август куни президент сайлови бўлиб ўтганди. Мамлакат Марказий сайлов комиссияси сайловда Александр Лукашенко олтинчи маротаба ютганини эълон қилган. Шундан сўнг мамлакатда норозилик намойиши бошланган.

Аввалроқ Беларусь президенти Лукашенко ҳаво-десант бригадасини Витебскдан мамлакат ғарбий чегарасидаги Гродно шаҳрига жойлаштириш тўғрисида буйруқ бергани маълум қилинганди. Бу нима сабабдан амалга оширилаётганига ойдинлик киритилмаган.