Европа парламентининг етакчи партиялари раҳбарлари Беларусда янги президентлик сайловларини ўтказишга, тинч намойишчиларга қарши зўравонлик ҳолатларини тергов қилишга ва сиёсий маҳбусларни озод қилишга чақирди. Бу ҳақда European People’s Party хабар қилди.
«Биз Беларусь халқини жасурлиги ва қатъияти учун олқишлаймиз ва уларнинг демократик ўзгариш ва озодликка бўлган интилишини қўллаб-қувватлаш учун қўлимиздан келганини қиламиз. 9 август куни бўлиб ўтган президент сайловлари на эркин, на адолатли бўлган. Ишончли ҳисоботлар Светлана Тихановскаянинг ғалабасидан далолат беради. Шунинг учун биз Александр Лукашенкони Беларуснинг қайта сайланган президенти сифатида тан олмаймиз ва уни Европа Иттифоқида Persona non grata деб биламиз», — дейилади томонлар қўшма баёнотида.
Европа парламенти вакиллари Россия расмийларини Беларусь ишларига яширин ёки ошкора ҳар қандай аралашувдан тийилишга чақирди, шунингдек, Европа Иттифоқига аъзо давлатлардан Россиянинг ушбу йўналишдаги ҳар қандай ҳаракатларига қарши чиқишни сўради.
Шунингдек, баёнот муаллифлари, ЕИ давлатлари ташқи ишлар вазирларининг Беларусдаги президент сайловларини сохталаштириш ва бунда айбдор бўлган шахсларга нисбатан қўшимча санкцияларни қўллаш тўғрисидаги қарорини қўллаб-қувватлади ҳамда иложи борича тезроқ санкциялар рўйхатини тузишни сўради.
Беларусь президенти Александр Лукашенко 17 август куни мамлакатда янги президент сайловлари ўтказилмаслигини айтди.
«Мени ўлдирмагунингизча, бошқа сайловлар бўлмайди», — деди Лукашенко.
Эслатиб ўтамиз, Беларусда 9 август куни президент сайлови бўлиб ўтди. Сайлов куни Минск марказида ҳарбий техника пайдо бўлди. Беларусь милицияси сайлов участкалари олдида тўпланган одамларни қўлга олди. Сайлов куни оқшомида мамлакатнинг барча етакчи оммавий ахборот воситаларининг сайтлари очилмай қолди. Пойтахт Минскда президент сайловидан кейин норозилик намойиши бошланди. Шундан буён мамлакатда норозилик намойишлари ва намойишчиларни қўллаб-қувватлаш учун чиқишлар давом этмоқда.
Беларусь Марказий сайлов комиссиясининг дастлабки ҳисоб-китобларига кўра, президентлик сайловларида республиканинг амалдаги раҳбари Александр Лукашенко 80,08 фоиз овоз тўплаган. Мухолифат номзоди Светлана Тихановская эса расмий маълумотларга кўра, 10,09 фоиз овоз олган.
Натижалар эълон қилингач, Светлана Тихановская ўтказилган сайловларда ўзини ғолиб дея ҳисоблашини маълум қилди ва Лукашенкога музокаралар ўтказиш таклифини берди. Шунингдек, у сайловларнинг натижаси юзасидан Марказий сайлов комиссиясига норозилик билдирди.
Telegram мессенжери 15 август куни Беларусдаги сайловлар борасида расмий каналини ишга туширди. Сўровномада қатнашганларнинг ярмидан кўпи Светлана Тихановскаяга овоз берганликларини белгилаган. Тихановскаянинг ўзи эса миллий етакчи бўлишга тайёрлигини билдирди.
Изоҳ (0)