Беларусь президенти Александр Лукашенко 17 август куни тонгда Минскдаги Ғилдиракли шатакчилар заводи (МЗКТ) ишчилари олдида чиқиш қилди. Корхона ходимлари президентни «Кет!» ва «Қўйиб юбор!» дея ҳайқириб кутиб олди. Буни Беларусь мухолифатининг Nexta Live Telegram-каналида кўриш мумкин.
«Раҳмат, — деди Лукашенко, корхона ишчилари олдида иккита ҳарбий шатакчининг устида тураркан. — Бу саволингизга ҳам жавоб бераман: яна бақиришингиз мумкин».
Meduza’нинг ёзишича, Лукашенко заводга вертолётда учиб келган. «Tut.by»нинг хабар беришича, дастлаб Беларусь президенти корхона цехларининг бирида махсус саралаб олинган одамлар олдида чиқиш қилган. Бу вақтда бошқа ишчилар Лукашенкони ташқарида, бошқа бир майдончада кутиб турган.
Завод ходимлари билан мулоқот вақтида Лукашенко Беларусда ҳокимият ваколатларини қайта тақсимлашни назарда тутувчи конституциявий ўзгаришлар устида иш олиб борилаётганини айтган. Лукашенконинг таъкидлашича, у президентлик ваколатлари билан бўлишишга тайёр, фақат бу «босим остида ва кўча орқали» бўлмаслиги керак.
Лукашенконинг маълум қилишича, Беларусда янги президент сайлови ўтказилмайди. «Мени ўлдирмагунингизгача, янги сайловлар бўлмайди», — дея Лукашенконинг сўзларидан иқтибос келтирмоқда «Tut.by».
Александр Лукашенконинг МЗКТдаги чиқиши олдидан бошқа саноат корхоналарининг ишчилари завод ҳудудига марш юриб келган. Норозилик карвони иштирокчилари «Кет!» деб ҳайқириб турган.
Беларусда 9 августдан бери президент Александр Лукашенкога қарши оммавий норозилик намойишлари бўлиб ўтмоқда — у олтинчи президентлик муддатига ўз номзодини қўйган ва, Беларусь Марказий сайлов комиссиясининг дастлабки маълумотларига кўра, сайловда яна ғалаба қозонган.
Норозилик намойишлари мамлакатнинг йирик саноат корхоналари ҳудудларида ҳам бўлиб ўтмоқда (иш ташлашлар бошланган). 16 август куни пойтахт Минскда мамлакат тарихидаги энг йирик митинг бўлиб ўтди — маълумотларга кўра, унда 200 минг киши қатнашган.
Изоҳ (0)