Туркияда эпидемиологик вазият ёмонлашаётгани сабабли айрим тоифадаги фуқаролар учун карантин чекловлари кучайтирилади. Бу ҳақда 16 август куни мамлакат Соғлиқни сақлаш вазирлиги маълум қилган.
Қайд этилишича, чекловлар Сиирт, Газиантеп, Истанбул, Элазиг, Ван, Кайсери, Бартин вилоятларида жорий этилади. Ушбу вилоятларда 65 ёшдан ошган кишиларга жамоат транспортидан фойдаланиш, савдо марказлари ва бозорларга ташриф буюриш, пикниклар ва диний ва оммавий маросимлар — унаштирув, никоҳ тўйлари кабиларга бориш тақиқланди.
Бундан ташқари, ижтимоий масофаланишга халал бериши мумкинлиги туфайли айрим вилоятларда витриналар ёки савдо нуқталаридаги алоҳида товарларни тротуарларга қўйиб сотиш тақиқланди, дам олиш жойларида сақланиши лозим бўлган ижтимоий масофа 4 метргача узайтирилди.
Шунингдек, Сиирт вилоятида 15 ёшгача бўлган болаларнинг оммавий тадбирларда иштирок этиши чекланди. Газиантеп вилоятида ой охирига қадар ҳар қандай норозилик намойишларини ўтказиш тақиқланди, Элазиг вилоятида тўйларни ўтказиш вақти уч соат билан чекланди.
Аввалроқ Италияда COVID-19’га чалинганлар сони ошгани сабабли карантин чекловлари кучайтирилгани, Францияда карантин юмшатилганидан сўнг COVID-19’га чалиниш бўйича кунлик касалланишлар сони ошгани хабар берилган эди.
Изоҳ (0)