Ижтимоий тармоқларда мактабларнинг қачон очилиши маълум бўлгани ҳақида турли хабарлар тарқатилмоқда. Халқ таълими вазирлиги мазкур хабарлар асоссиз эканини, якуний хулоса махсус комиссия томонидан чиқарилиши яна бир бор маълум қилди, дея хабар бермоқда «Kun.uz».

Ижтимоий тармоқларда тарқатилаётган хабарларнинг бирида «1—4 ва 11-синфлар 2 сентябрдан, 3—7 ва 9-синфлар 20 октябрдан, 5—8 ва 10-синфлар 5 ноябрдан мактабга бориши» ҳақида айтилган бўлса, яна бирида «10 сентябргача мактаблар очилишига кўрсатма берилгани» ҳақида айтилади.

Маълум қилинишича, Халқ таълими вазирлиги ахборот хизмати раҳбари Лайло Рустамова юқоридаги хабарларни рад этган.

«Мактаблар қачон очилиши ҳақида якуний қарор махсус комиссия томонидан чиқарилади. Комиссия қарори яқин орада чиқиши керак. Вазирлик ҳам мактаблар қачон очилишидан хабардор эмас. Лекин ўқув йилини бошлаш бўйича ҳозир 3 та сценарий устида иш олиб борилмоқда», – деди вазирлик расмийси.

Эслатиб ўтамиз, Халқ таълими вазирлиги 2020/2021-ўқув йили учун 3 та сценарий устида ишлаётганини маълум қилган эди.

Вазирлик эълон қилган 1-сценарийга кўра, пандемия ҳолати барқарорлашиб, мактаблар одатий тартибда ўз фаолиятини бошлайди. Бу вазирлик ва ўқувчиларимиз учун энг мақбул вариант. Халқаро тажриба мактаб ёшидаги болаларга касаллик кам ҳолатда юқишини, улардан катталарга юқиш хавфи ҳам камлигини кўрсатмоқда;

2-сценарийга кўра, Соғлиқни сақлаш вазирлигининг Ўзбекистонда болаларда вирус кечиши бўйича хулосаси ижобий бўлмаган тақдирда таълим онлайн тартибда давом эттирилишига тўғри келиши мумкин;

3-сценарий гибрид сценарий бўлиб, мактаблар очилади. Мактаблар ҳам синф тизимига ўтказилади. Фақат маълум бир ҳудуд, мактаб ҳолатидан келиб чиқиб, ўқувчиларнинг онлайн дарсларда ёки мактабдаги дарсларда билим олиши давом эттирилади.