Тошкентда юк машиналарини божхона тўловларисиз олиб киришга уринишлар фош этилди

Президентнинг 6 мартдаги «Юк ва йўловчи ташиш тизимини тубдан такомиллаштириш чора-тадбирлари тўғрисида»ги қарорига биноан, 2022 йил 1 январга қадар ишлаб чиқарилганига 4 йилдан ошмаган, юк ташиш учун мўлжалланган транспорт воситалари ҚҚС ва божхона расмийлаштируви йиғимларидан ташқари божхона тўловларидан озод қилинган.

Божхоначилар томонидан аниқланган навбатдаги ҳолатларда мазкур имтиёзни суиистеъмол қилишга бўлган уринишларнинг олди олинди, дея хабар бермоқда Давлат божхона қўмитаси ахборот хизмати.

Тошкент шаҳар божхона бошқармаси Контрабандага қарши курашиш ва божхона аудити бўлими ходимлари томонидан «Чуқурсой» ташқи иқтисодий фаолият божхона постида фуқаро Н.Б. номига хориждан келтирилган KIA Bongo 3 русумли юк автотранспорт воситаси белгиланган тартибда божхона кўригидан ўтказилди.

Натижада автотранспорт воситасининг музлатгичли юкхонаси эски ва умуман ишламаслиги, ёқилғи қуйиш баки янги ўрнатилганлиги, двигатель ва ёқилғи баки бир-бирига умуман уланмаганлиги, ҳужжатларда автотранспорт дизелда ҳаракатланиши кўрсатилган бўлса-да, ундаги двигатель бензин ва газда ҳаракатланиши аниқланди.

Божхона кўриги давомида маълум бўлишича, фуқаро Н.Б. божхона органларига нотўғри маълумотларни тақдим этиш орқали салкам 230 миллион сўмлик божхона имтиёзларидан фойдаланишни кўзлаган экан.

Мазкур ҳолат юзасидан процессуал ҳужжатлар расмийлаштирилиб, автотранспорт воситаси вақтинча сақловга олинди.

Шу каби ҳолат Қорақалпоғистон божхона бошқармаси Контрабандага қарши курашиш ва божхона аудити бўлими ходимлари томонидан ҳам фош этилди.

«Тўрткўл» ташқи иқтисодий фаолият божхона постида тумандаги масъулияти чекланган жамиятлардан бирининг номига келтирилган 3 та Howo русумли юк автотранспорт воситалари эксперт-криминалистика текширувларидан ўтказилганида, ушбу юк машиналари ҳужжатларда кўрсатилганидек, 2019 йилда эмас, балки 2014—2015 йилларда ишлаб чиқарилгани маълум бўлди.

Шу тариқа ўртача бозор нархи 1 миллиард 345 миллион сўмни ташкил қилувчи мазкур транспорт воситаларини божхона тўловларисиз олиб киришга бўлган уринишга чек қўйилди ҳамда уларга нисбатан салкам 650 миллион сўмлик божхона тўловлари ҳисобланди.

Ҳолат юзасидан фуқаролар Н.У. ва А.У.га нисбатан процессуал ҳужжатлар расмийлаштирилди.

Ҳозирги кунда мазкур ҳолатлар юзасидан терговга қадар текширув ҳаракатлари олиб борилмоқда.