Самарқандда қўшниси билан тортишиб қолган шахс уни машинасида уриб, ўлдириб қўйди

Самарқанд вилоятининг Каттақўрғон тумани ҳудудида ҳаракатланиб кетаётган машина ҳайдовчиси йўловчиси билан тортишиб қолиб, уни машинаси билан уриб жазолади. Натижада йўловчи олган тан жароҳати оқибатида шифохонада вафот этди. Бу ҳақда «Дарё» мухбири хабар берди.

Таъкидланишича, 2019 йилнинг 21 август куни, тахминан, соат 18:30 да Каттақўрғон тумани «Қўшқўтон» МФЙ ҳудудидан ўтувчи Мойбулоқ—Хонақа автомобиль йўлида ҳаракатланиб кетаётган Nexia ҳайдовчиси Ж.П. қўшниси М.Ҳ.нинг илтимосига кўра, йўлда тўхтайди. Қўшнисининг машина ёнида ҳожат чиқараётганини кўрган ҳайдовчи қўшнисига узоқроқ кетишини айтади. Қўшни эса бунга жавобан уни бир марта уради.

Ўзидан анча ёш бўлган қўшнисига кучи етмаслигини билган Ж.П. қўшнисини йўлда қолдириб, кетиб қолади. Тахминан, 500 метр юрганидан сўнг қўшнисидан ўч олиш мақсадида ортга қайтади ва бошқарувидаги автомашинада қарама-қарши ҳаракатланиб келиб, М.Ҳ.нинг орқа томонидан бориб, уради.

Оқибатда М.Ҳ. автомашина капоти устига отилиб тушиб, бошининг орқа томони билан автомашина олд ойнаси чап бурчак қисмига урилади ва ойнанинг шу қисмини синдириб, ерга йиқилади. Ҳайдовчи эса унга ёрдам бермай, яшаш уйига қочиб кетади. Натижада М.Ҳ. олган жароҳатлари туфайли Каттақўрғон туман тиббиёт бирлашмасининг жонлантириш бўлимида вафот этган.

Жиноят ишлари бўйича Каттақўрғон туман суди судьяси Темур Алмаматовнинг маълум қилишича, судланувчи Ж.П. қилган жиноятини тан олиб, айбига иқрор бўлган ва қилмишини мастлиги билан изоҳлаган. Суд эса мазкур ҳолат юзасидан Ж.П.га Жиноят кодексининг 97-моддаси 1-қисми (қасддан одам ўлдириш) билан жиноят иши қўзғатиб, айбдор деб топган ва 10 йил муддатга озодликдан маҳрум қилган.