Ўзбекистонга коронавирус инфекцияси кириб келиши ва тарқалишининг олдини олиш юзасидан чора-тадбирлар дастурини тайёрлаш бўйича Республика махсус комиссияси қарорига мувофиқ, 15 августдан бошлаб маҳаллий авиақатновлар ва темир йўл қатновлари бошланади. Бу ҳақда Транспорт вазирлиги ахборот хизмати хабар берди.
Маълум қилинишича, маҳаллий авиақатновлар ва темир йўл қатновини ташкил этишда доимий равишда ҳар бир авиақатнов ва темир йўл қатновидан олдин тегишли ҳаво кемаси ва темир йўл вагонлари (шу жумладан, ҳар бир ўриндиқни) тўлиқ дезинфекциядан ўтказиш ҳамда ҳавосини зарарсизлантириш тизимини жорий этиш чоралари кўрилади.
Республика махсус комиссиясининг 15 августдан карантин чекловларини босқичма-босқич юмшатиш бўйича қабул қилган қарорига асосан «Ўзбекистон темир йўллари» АЖ томонидан 15 августдан бошлаб маҳаллий йўналишларда босқичма-босқич поездлар ҳаракати қайта тикланади.
Жумладан, юқори тезликда ҳаракатланувчи Афросиёб поездлари Тошкент—Самарқанд—Бухоро—Тошкент йўналишида 2 та, Тошкент—Самарқанд—Қарши—Тошкент йўналишида 1 та, шунингдек, Тошкент—Андижон—Тошкент йўналишида 2 та йўловчи поезди қатнови йўлга қўйилади.
Йўловчилар чипталарни темир йўл кассаларидан, шунингдек, онлайн тарзда ҳам харид қилиши мумкин.
Маҳаллий йўналишларда авиа қатновларни тиклаш жараёни ҳам босқичма-босқич амалга оширилади. Хусусан, Uzbekistan Airways авиакомпанияси томонидан 15 август санасидан эътиборан Тошкент—Нукус—Тошкент, Тошкент—Урганч—Тошкент йўналишида ҳафтасига уч маротабадан, Тошкент—Термиз—Тошкент йўналишида эса ҳафтасига икки маротабадан парвозларни амалга ошириш бошланади.
Йўловчилардан поездлар ва самолётлар бортига чиқишда, вокзал ва аэропортлар ҳудудида ҳамда йўл давомида санитария гигиена қоидаларига доимий равишда қатъий риоя қилишлари талаб қилинади.
Фуқароларнинг жамоат жойларида ижтимоий масофани (2 метр) сақлаши, тиббий ниқобда бўлиши каби карантин чекловлари 15 августдан кейин ҳам сақланиб қолинади. Тана ҳарорати 37 даража ва ундан юқори бўлган ёхуд инфекция аломатлари мавжуд бўлган фуқароларнинг жамоат жойларига чиқишига йўл қўйилмайди.
Эслатиб ўтамиз, Ўзбекистонда коронавирус билан боғлиқ вазиятнинг кескинлашаётгани сабабли 10 июлдан 1 августгача мамлакатда қатъий карантин чоралари жорий қилинади. 10 июлдан тўйлар, оилавий ва оммавий тадбирлар тақиқланади, автотранспорт ҳаракати чекланади. Кейинроқ карантин чекловлари 15 августга қадар узайтирилди.
Изоҳ (0)