«Ўзгидромет» Ўзбекистонда июль ойида атмосфера ҳавоси ифлосланиши мониторинги 21 та шаҳардаги 56 та стационар кузатув пунктида амалга оширилганини хабар қилди.
Қайд этилишича, аҳоли сонига қараб ва норматив ҳужжатлар асосида шаҳарларда 2 тадан 4 тагача пост жойлаштирилган. Кузатув пунктларида атмосфера ҳавосидаги 12 та ифлослантирувчи модда назорат қилинади.
Июль ойида 17 та шаҳарда «паст» ифлосланиш даражаси, Тошкент, Олмалиқ, Ангрен ва Фарғона шаҳарларида «юқори» ифлосланиш даражаси қайд этилган.
Шаҳарларда ҳавонинг ифлосланиши саноат корхоналари чиқарадиган ажратмалар, қурилиш ишлари ва метеошароитларга боғлиқ.
Июлда республика бўйича атмосфера ҳавосининг ифлосланиш даражаси меъёр чегарасида бўлган.
Республика бўйича радиациявий фон ифлосланиши ҳолати ҳақида. Атмосфера еролди қатламининг радиациявий мониторинги «Ўзгидромет» тармоғида ҳар куни 40 та шаҳар ва аҳоли пунктларидаги метеомайдончаларда гамма-нурланиш экспозиция дозасини асбоблар ёрдамида ўлчаш орқали амалга оширилади. Ўтказилган радиациявий мониторинг бўйича 2020 йил июлда радиациявий гамма-фон қийматлари рухсат берилган меъёрдан ошмаган.
Маълумот учун: шаҳарларда атмосфера ҳавоси сифатини мониторинг қилиш дастури бешта асосий ифлослантирувчи модда: чанг (қаттиқ муаллақ заррачалар), олтингугурт диоксиди, углерод оксиди (ис гази), азот диоксиди, азот оксидини ўз ичига олади. Саноат ажратмалари таркиби ва яқинда жойлашган шаҳарлар ва туташган ҳудудлар хусусиятларига қараб дастурий ўлчовларга бошқа моддалар (аммиак, фенол, формалдегид, озон, хлор, қаттиқ фторидлар, фторли водород, оғир металлар) қўшилади.
Атмосфера ҳавоси ҳолати устидан кузатувлар ҳар куни ҳафтасига 6 кун, сутка давомида 3 марта (маҳаллий вақт билан соат 07:00, 13:00, 19:00 да) амалга оширилади. «Ўзгидромет» кузатув пунктларида ҳаво намуналари аспиратор усулида олинади ва марказ лабораторияларида таҳлил қилинади.
Аввал «Ўзгидромет» томонидан 2020 йил май ойида ўтказилган атмосфера ҳавоси ифлосланиши мониторинги натижаларига кўра, 24 та шаҳарда ҳавонинг ифлосланиш даражаси паст бўлган, юқори ифлосланиш даражаси Олмалиқ шаҳрида АИИнинг 8,85 га тенг қиймати билан қайд этилгани хабар қилинганди.
Изоҳ (0)