Жаҳон банки экспертлари коронавирус пандемияси Марказий Осиёнинг таълим олувчи ёшлар жами аҳолининг қарийб ярмини ташкил қилувчи мамлакатларидаги таълим, инсон капитали сифати ва ижтимоий-иқтисодий ривожланишга узоқ муддатли салбий таъсир кўрсатишидан огоҳлантирди.
Қайд этилишича, инқироз ёш авлоднинг келажакдаги даромадларига таҳдид солмоқда. Ўсмирлар ўртасида саводсизлик даражаси ошиши прогноз қилинмоқда. Яъни жамият ҳаётида самарали иштирок этиш учун ўқиш, ёзиш ва математик кўникмалардан фойдалана олмайдиган ўқувчилар сони ошмоқда.
Таъкидланишича, пандемияга қадар ҳам Марказий Осиёда таълим тизимида бир қатор муаммолар бўлган. Хусусан, таълимдаги камбағалликни йўқ қилиш, заиф ўқувчилар учун тенг имкониятларни яратиш ва инклюзивликни ривожлантиришда қийинчиликларга дуч келинган. Марказий Осиёдаги ўқувчилар Европадаги тенгдошларидан таълим олишда ўртача ярим йил ортда қолган.
«Даромади турлича бўлган оилалардан бўлган ўқувчилар ўртасидаги таълим олишдаги тафовут ўсиб бораётгани, айниқса, ташвишга солмоқда. Бу ўқитувчилар ва ўқувчилар учун масофадан туриб ўқитиш ва ўқув материалларидан фойдаланиш имкониятларидаги фарқлар, шунингдек, ўқитувчиларнинг қўллаб-қувватлашлари ва таълим олишда оиланинг ҳиссаси каби бир қатор омиллар сабабли юзага келмоқда», — дейилади Жаҳон банки хабарида.
Мутахассисларнинг таъкидлашича, COVID-19 пандемияси ўқув муаммоларини янада кучайтирди, чунки мактабларнинг ёпилиши аҳолининг муҳтож қатламларига, шу жумладан, кам таъминланган оилалардаги ўқувчилар, чекка ҳудудлар ва алоҳида эҳтиёжли одамларга янада салбий таъсир қилади.
«Коронавирус пандемияси таълим ва ўқитиш тизимига шунчалик вайронагарчилик билан таъсир кўрсатадики, унинг оқибатлари, шу жумладан, Марказий Осиёнинг ўзида 44 миллиард доллар миқдоридаги иқтисодий йўқотиш кейинги 10 йил давомида ҳам сезилади ва бу ҳали энг ёмон сценарий эмас», — деб таъкидлаган Жаҳон банкининг Марказий Осиёдаги таълим соҳасидаги етакчи мутахассиси Айша Вауда.
Жаҳон банки пандемия оқибатларини бартараф этиш режаларини ишлаб чиқишда биринчи навбатда таълим масалаларига эътибор қаратишни тавсия қилмоқда. Экспертларнинг фикрича, мамлакатлар таълим учун бюджетдан ажратиладиган маблағни сақлаб қолиши, масофавий ўқитиш сифатини ошириши, таълим дастурларида нафақат билимларга, балки қобилият ва кўникмаларни ривожлантиришга урғу бериш, ўқув вақтидаги йўқотишларни қоплаш учун самарали стратегияларни ишлаб чиқиш лозим.
Изоҳ (0)