«Ювентус» Чемпионлар Лигасида муваффақиятсизликка учраган тақдирда клуб бош мураббийи Маурицио Саррини истеъфога чиқариши мумкин. Бу ҳақда италиялик таниқли журналист Танкреди Палмери хабар бермоқда.
Манбага кўра, Турин клуби бир неча мураббийлар билан боғланиб, уларнинг жамоага келиши эҳтимолини муҳокама қилган. Клубнинг асосий мақсади «Реал» бош мураббийи Зинедин Зидан бўлган, бироқ франциялик мутахассис «Реал»ни тарк этиш нияти йўқлигини маълум қилган.
Шунингдек, жамоа Маурисио Почеттино, Симоне Инзаги, Лучано Спаллетти ва Жан Пьеро Гасперини билан ҳам музокара ўтказгани айтилмоқда.
«Ювентус» Италия А Сериясининг 2019/2020 йилги мавсумини 1-ўринда якунлади. Жамоа 7 август куни Чемпионлар Лигаси 1/8 финали доирасида ўз майдонида «Лион»ни қабул қилади. Томонларнинг дастлабки беллашувида француз клуби 1:0 ҳисобида ғалаба қозонганди.
Мавзуга доир:
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @Daryo_Sport24’га обуна бўлинг!
Изоҳ (0)