Беларусь марказий сайлов комиссияси томонидан президентликка номзод сифатида рўйхатдан ўтказилиши рад қилинган сиёсатчи Валерий Цепкало 32 та хориж мамлакатлари раҳбарларига хат йўллаб «Беларусда очиқ ва холис сайловларнинг» ўтказилишини қўллаб-қувватлашга чақирди. Мактубнинг мазмуни «Дожд» ва «Интерфакс» нашрлари томонидан қисман келтириб ўтилган.

Валерий Цепкало.

Фото: Ўзбекистон Ахборот технологиялари ва коммуникацияларини ривожлантириш вазирлиги

«Беларусь ҳукумати президентлик сайловларининг очиқ ва ошкора ўтишига тўсқинлик қилмоқда, шунингдек, сайлов жараёни адолат ҳамда шаффофликни талаб қилган одамларга нисбатан кучли босим ўтказилмоқда», — дейилган хатда.

Валерий Цепкало хориж давлатларининг етакчилари ва жамоатчиликни Беларусдаги «халққа нисбатан зўравонлик сиёсатига» эътибор қаратиш, мамлакатда президентлик сайловларининг ўтказилишида халқаро кузатувчиларнинг иштирокида кўмак бериш ва фуқароларнинг мустақил давлат ҳудудида эркин ва шаффоф сайловларда иштирок этишини таъминлашда ёрдам сўраган.

Цепкало Беларусдаги мухолифатнинг асосий мақсади ҳақида ҳам тўхталиб ўтган: хатда ёзилишича Светлана Тихановская сайловларда ғалаба қозонса, барча сиёсий маҳбуслар озод қилиниб, уч-олти ой муддатда қайтадан президенлик сайловлари муносиб номзодлар иштирокида ўтказилади.

Валерий Цепкало мактубларини АҚШ, Канада, Буюк Британия, Германия, Франция, Украина, Арманистон, Болгария, Венгрия, Грузия, Италия, Латвия, Литва, Польша ва бошқа давлатларнинг (бошқарув шаклига кўра) президентлари ва бош вазирларига жўнатган. «Дожд» нашри ушбу рўйхатда Россиянинг йўқлигини қайд этган.

Беларусда 9 август куни навбатдаги президентлик сайловлари ўтказилади. Амалдаги давлат раҳбари Алексанр Лукашенко олтинчи марта сайловларда номзод сифатида иштирок этмоқда. Унинг асосий икки рақобатчиси — Виктор Бабарико ҳамда Валерий Цепкало МСКдан ўз номзодларини рўйхатда ўтказа олмаган. Бабарико иқтисодий жиноятларда айбланиб ҳибсга олинган. Цепкало эса қамоққа олиниши мумкинлигидан хавотирланиб Беларусдан чиқиб кетган, дастлаб Москвага, кейинчалик Киевга келган.

Виктор Бабарико ҳибсга олингани ва МСКнинг Лукашенкога рақобатчи бўлиши кутилаётган асосий номзодларни рўйхатдан ўтказмаганидан кейин Беларусда оммавий норозилик намойишлари ўтказилган, уларни бостиришга кучишлатар тизим вакиллари жалб қилинган. Юзлаб одамлар қамоққа олинган.