Belarus markaziy saylov komissiyasi tomonidan prezidentlikka nomzod sifatida ro‘yxatdan o‘tkazilishi rad qilingan siyosatchi Valeriy Sepkalo 32 ta xorij mamlakatlari rahbarlariga xat yo‘llab “Belarusda ochiq va xolis saylovlarning” o‘tkazilishini qo‘llab-quvvatlashga chaqirdi. Maktubning mazmuni “Dojd” va “Interfaks” nashrlari tomonidan qisman keltirib o‘tilgan.
“Belarus hukumati prezidentlik saylovlarining ochiq va oshkora o‘tishiga to‘sqinlik qilmoqda, shuningdek, saylov jarayoni adolat hamda shaffoflikni talab qilgan odamlarga nisbatan kuchli bosim o‘tkazilmoqda”, — deyilgan xatda.
Valeriy Sepkalo xorij davlatlarining yetakchilari va jamoatchilikni Belarusdagi “xalqqa nisbatan zo‘ravonlik siyosatiga” e’tibor qaratish, mamlakatda prezidentlik saylovlarining o‘tkazilishida xalqaro kuzatuvchilarning ishtirokida ko‘mak berish va fuqarolarning mustaqil davlat hududida erkin va shaffof saylovlarda ishtirok etishini ta’minlashda yordam so‘ragan.
Sepkalo Belarusdagi muxolifatning asosiy maqsadi haqida ham to‘xtalib o‘tgan: xatda yozilishicha Svetlana Tixanovskaya saylovlarda g‘alaba qozonsa, barcha siyosiy mahbuslar ozod qilinib, uch-olti oy muddatda qaytadan prezidenlik saylovlari munosib nomzodlar ishtirokida o‘tkaziladi.
Valeriy Sepkalo maktublarini AQSh, Kanada, Buyuk Britaniya, Germaniya, Fransiya, Ukraina, Armaniston, Bolgariya, Vengriya, Gruziya, Italiya, Latviya, Litva, Polsha va boshqa davlatlarning (boshqaruv shakliga ko‘ra) prezidentlari va bosh vazirlariga jo‘natgan. “Dojd” nashri ushbu ro‘yxatda Rossiyaning yo‘qligini qayd etgan.
Belarusda 9-avgust kuni navbatdagi prezidentlik saylovlari o‘tkaziladi. Amaldagi davlat rahbari Aleksanr Lukashenko oltinchi marta saylovlarda nomzod sifatida ishtirok etmoqda. Uning asosiy ikki raqobatchisi — Viktor Babariko hamda Valeriy Sepkalo MSKdan o‘z nomzodlarini ro‘yxatda o‘tkaza olmagan. Babariko iqtisodiy jinoyatlarda ayblanib hibsga olingan. Sepkalo esa qamoqqa olinishi mumkinligidan xavotirlanib Belarusdan chiqib ketgan, dastlab Moskvaga, keyinchalik Kiyevga kelgan.
Viktor Babariko hibsga olingani va MSKning Lukashenkoga raqobatchi bo‘lishi kutilayotgan asosiy nomzodlarni ro‘yxatdan o‘tkazmaganidan keyin Belarusda ommaviy norozilik namoyishlari o‘tkazilgan, ularni bostirishga kuchishlatar tizim vakillari jalb qilingan. Yuzlab odamlar qamoqqa olingan.
Izoh (0)