Буюк Британия ҳукумати мушукда коронавирус инфекциясининг биринчи ҳолати қайд этилгани маълум қилди. Тахминларга кўра, мушук касалликни коронавирусга чалинган эгаларидан юқтирган. Бу ҳақда «РБК» хабар берди.
Ҳозирда уй ҳайвони эгалари ҳам, мушук ҳам коронавирусдан халос бўлган. Буюк Британиянинг бош ветеринари Кристин Миддлмиснинг айтишича, ҳайвоннинг коронавирусга чалиниши хавотирли эмас.
«Бу жуда кам учрайдиган ҳодиса. Шу пайтгача касалланган ҳайвонлар фақат енгил клиник белгиларни кўрсатиб, бир неча кун ичида соғайган», — деди ветеринар.
Миддлмиснинг фикрича, уй ҳайвонлари вирусни одамларга тўғридан-тўғри юқтирганлиги ҳақида ҳеч қандай маълумот йўқ.Бу мушукларда аниқланган коронавируснинг биринчи ҳолати эмас. Илгари ушбу ҳайвонларда COVID-19 билан касалланиш ҳолати АҚШ ва Россияда қайд этилган.
Жаҳон соғлиқни сақлаш ташкилоти ва Бутунжаҳон ҳайвонлар саломатлиги ташкилоти маълумотларига кўра, одамларнинг ит ва мушуклардан COVID-19 юқиши ҳолатлари ҳали аниқланмаган ва бундай инфекция эҳтимоли тўғрисида далиллар йўқ. Бироқ COVID-19’нинг ҳаво томчилари орқали бир мушукдан бошқасига юқиши эҳтимоли олимлар томонидан тасдиқланган.
Изоҳ (0)