Қирғизистонда ўтган бир сутка ичида 28 киши коронавирус ва пневмониядан вафот этди, Қозоғистонда эса яна 1526 кишида COVID-19 аниқланди

Қозоғистонда ўтган бир сутка ичида яна 870 кишида коронавирус аниқланди, шунингдек, 656 кишида касалликнинг белгисиз ҳолати қайд этилган. Умумий ҳисобда бир сутка давомида COVID-19 қайд этилган беморлар сони 1526 кишини ташкил этган, деб хабар беради Tengrinews.

Коронавирусга чалиниш бўйича янги ҳолатлар қуйидаги ҳудудларда аниқланган:

• Атирау вилояти — 10 053 (+65);
• Олмаота шаҳри — 10 965 (+253);
• Нур-Султон шаҳри — 10 320 (+250);
• Қарағанда вилояти — 8176 (+118);
• Чимкент шаҳри — 4733 (+25);
• Ғарбий Қозоғистон вилояти — 5480 (+86);
• Олмаота вилояти — 4115 (+85);
• Шарқий Қозоғистон вилояти — 5671 (+179);
• Туркистон вилояти — 2663 (+48);
• Жамбил вилояти — 3339 (+51);
• Ақтўбе вилояти — 2958 (+11);
• Манғистов вилояти — 2743 (+44);
• Павлодар вилояти — 2937 (+57);
• Қизилўрда вилояти — 2807 (+69);
• Шимолий Қозоғистон вилояти — 2849 (+70);
• Ақмўла вилояти — 2422 (+52);
• Костанай вилояти — 2417(+63).

Бутун мамлакат бўйлаб коронавирусга чалинганлар сони 84 648 кишига етган. Ҳозирга қадар 54 404 киши соғайган. Tengrinews’нинг ёзишича, мамлакатда коронавирус қурбонлари сони 610 кишига етган, бироқ расмий статистикада вафот этганлар сони ҳамон 585 кишини ташкил этмоқда.Қирғизистонда 28 июль ҳолатига кўра, коронавирус ва шифохонадан ташқарида юқтирилган пневмония билан касалланиш бўйича яна 548 та ҳолат қайд этилди, деб хабар беради Kloop.

Коронавирусга чалинган янги касалларнинг 139 нафари Бишкек шаҳри ҳисобига тўғри келмоқда. Шунингдек, қуйидаги ҳудудларда ҳам коронавирус билан касалланиш бўйича янги ҳолатлар қайд этилган:

• Чуй вилояти — 36;
• Ўш шаҳри — 33;
• Ўш вилояти — 65;
• Иссиқкўл вилояти — 83;
• Жалолобод вилояти — 101;
• Норин вилояти — 36;
• Талас вилояти — 30;
• Боткен вилояти — 25.

Мамлакатда пандемия бошланганидан буён COVID-19 ва касалхонадан ташқарида юқтирилган пневмонияга чалинганларнинг умумий сони 33 844 кишига етган. Коронавирус ва пневмония билан касалланганларга оид статистика умумийлаштирилгач, уларнинг сони ортиб кетган.

Бундан ташқари, Соғлиқни сақлаш вазирлиги томонидан ўтган бир сутка ичида 28 кишида коронавирус ва пневмониядан вафот этгани қайд қилинган. Республикада пандемия бошланганидан буён вафот этганлар сони 1329 кишига етди. Ҳозирга қадар 22 296 нафар бемор соғайган.

Жонс Ҳопкинс университети маълумотларига кўра, Афғонистонда коронавирус билан касалланганлар сони 36 363 кишига етди.

Бутун мамлакат бўйлаб коронавирусдан ҳозирга қадар 25 358 бемор тузалди. Умумий ҳисобда 1270 киши касаллик оқибатида вафот этган.

Тожикистонда коронавирус билан касалланганлар сони 7235 кишига етди, деб хабар беради «РИА Новости».

Мамлакат Соғлиқни сақлаш вазирлигининг маълумотларига кўра, республикада ўтган сутка давомида яна 43 кишида коронавирус аниқланган.

Мамлакатда ўтган бир сутка ичида 58 кишига шифохонадан жавоб берилган. Тожикистонда ҳозирга қадар 60 киши COVID-19 қурбонига айланган, 6028 бемор (83,3 фоиз) соғайган.

Ўзбекистонда 28 июль соат 10:00 ҳолатига кўра коронавирусга чалинганлар сони 21 506 тага етди. Айни пайтда мамлакатда 11 674 нафар коронавирус инфекциясига чалинган фуқаролар (54 фоиз) соғайган. Вазирлик ҳисоби бўйича ҳозиргача касалликка чалинган беморларнинг 122 нафари вафот этган.